میڈرڈ: (دنیا نیوز) گھر کے شیر گھر میں ہی ڈھیر ہو گئے، فٹبال یوئیفا چیمپئنز لیگ کے بڑے مقابلے میں پیرس سینٹ جرمین نے بارسلونا کو چار ایک کی بڑی شکست سے دوچار کر دیا۔ میسی کے پرستار مایوسی کا شکار رہے۔
اسپین کے تاریخی اسٹیڈیم کیمپ ناؤ میں فٹبال یوئیفا چیمپئنز لیگ کا تگڑا مقابلہ، پی ایس جی اور میزبان بارسلونا کا آمنا سامنا ہوا۔ سپر اسٹار لیونل میسی نے ستائیسویں منٹ پنلٹی پر گول کر کے برتری حاصل کی۔ جوابی وار میں بائیس سالہ امباپے نے گول کر کے حساب برابر کر دیا۔
مایہ ناز کھلاڑی نیمار کے بغیر اِن ایکشن ٹیم کا مورال ہائی، دوسرے ہاف میں مزید تین گول اسکور کیے، امباپے نے شاندار ہیٹ ٹرک کی۔ کیان نے بھی ایک کامیابی حاصل کی۔
دوسرے میچ میں محمد صلاح کی ٹیم لیورپول نے لیپزگ کے خلاف دو صفر کی فتح سمیٹی۔ تابڑ توڑ حملوں کے باجود پہلے ہاف میں کوئی گول نہ ہوا، تریپن منٹ پر محمد صلاح نے ٹیم کو سبقت دلائی، اس کے پانچ ہی منٹ بعد مین نے برتری دو صفر تک پہنچائی، اسی اسکور سے لیور پول نے کامیابی پائی۔ یوئیفا چیمپئنز لیگ پری کوارٹر فائنل کے فرسٹ لیگ کے تگڑے مقابلوں نے فٹبال دیوانوں کو خوب محظوظ کیا۔
