نیویارک(نیٹ نیوز) ٹیکنالوجی کمپنی ایکس پرائز نے اعلان کیا ہے کہ ایسا کوئی بھی فرد یا ادارہ جو سو کلومیٹر کے فاصلے سے روبوٹ کو کنٹرول کرکے مدد فراہم کرنے والا کامیاب نظام تیار کرے گا، اسے 10 ملین ڈالر (ایک ارب روپے ) انعام دیا جائے گا۔
اس مقابلے کا مقصد ایسے روبوٹ کی تیاری ہے جو اپنے سامنے جو کچھ بھی ہورہا ہو اسے نہ صرف سن، دیکھ اور چھوکر محسوس کرسکے بلکہ ان تمام معلومات کو پوری درستگی کے ساتھ 100 کلومیٹر دوری تک نشر بھی کرسکے ۔ انعام دینے کا اہتمام جاپانی ایئرلائن اے این اے نے کیا ہے اور موصول ہونے والے پراجیکٹ کا حتمی فیصلہ جنوری 2019 میں بین الاقوامی جج کریں گے ۔
بعد ازاں اپریل 2020 سے اپریل 2021 تک ٹیموں کو مظاہرہ کرنا ہوگا کہ ان کا بنایا ہوا ’’اوتار‘‘ کیا کچھ کرسکتا ہے جس کے لیے ابتدائی طور پر 10 لاکھ ڈالر کی رقم دی جائے گی۔ پھر ہر سال بہترین ٹیم آگے بڑھتی رہے گی اور اکتوبر 2021 میں 80 لاکھ ڈالر کی رقم ایک ٹیم کے حوالے کی جائے گی جس میں پانچ روز تک حتمی ایجاد کا عملی مظاہرہ کرنا ہوگا جو مقابلے کا فائنل بھی ہوگا۔
