کراچی: (دنیا نیوز) صوبہ سندھ کے تین اضلاع میں آپٹیکل فائبر بچھانے کے منصوبہ پر عملدرآمد شروع کر دیا گیا ہے، اس سلسلے میں یونیورسل سروس فنڈز اور پی ٹی سی ایل کے نمائندوں نے کراچی میں ایک تقریب میں دستخط کر دیئے۔
منصوبے کے تحت سندھ کے تین اضلاع نظیر آباد، خیرپور اور نوشہرو فیروز میں دو ارب 10 کروڑ روپے سے فائبر آپٹیکل بچھائی جائے گی۔
اس سلسلے میں کراچی میں معاہدے کی تقریب میں صدر مملکت ڈاکٹر عارف علوی اور وفاقی وزیر انفارمیشن ٹیکنالوجی سید امین الحق بھی شریک ہوئے۔
تقریب سے خطاب میں صدر عارف علوی نے کہا کہ پاکستان میں ترقی کی ڈیجیٹل راہیں کھل رہی ہیں۔ ڈیجیٹل اکانومی بھی تیزی سے پھیل رہی ہے۔ کمیونیکیشن سسٹم کو بہتر اور تیز کرنے کی ضرورت ہے۔
صدر مملکت کا کہنا تھا کہ رواں سال گلگت بلتستان میں 20 سے 22 لاکھ افراد سیاحت کیلئے جائیں گے۔ دنیا کی ٹاپ کمپنیوں میں انفارمیشن ٹیکنالوجی سے وابستہ کمپنیاں ہیں۔ پاکستان کو تیز ترقی کرنے کیلئے انفارمیشن ٹیکنالوجی کے شعبے پر توجہ دینا ہوگی۔
انہوں نے کہا کہ پاکستان کی کامیابی اور ترقی انفارمیشن ٹیکنالوجی سے وابستہ ہے۔ کورونا بحران کیساتھ کامیابی سے نمٹنے پر ملکی معیشت میں بہتری آئی۔
ان کا کہنا تھا کہ پاکستان میں نوجوانوں کی بڑی تعداد ہماری اصل طاقت اور سرمایہ ہے۔ نوجوانوں کو آئی ٹی کی تعلیم دے کر ملک کو ترقی کی راہ پر گامزن کیا جا سکتا ہے۔ کورونا کے باوجود پاکستان کی ترقی کی شرح میں اضافہ ہو رہا ہے۔ ایمیزون کا ملک میں آنا بھی خوش آئند ہے۔
