واشنگٹن: (ویب ڈیسک) دنیا کے امیر ترین شخص بل گیٹس اور ملینڈا فرنچ نے اپنے فلاحی ادارے کے انتظامات اور دیکھ بھال کیلئے تمام قواعد وضوابط کو طے کر لیا ہے۔
خیال رہے کہ گیٹس فاؤنڈیشن دنیا کا سب سے بڑا فلاحی ادارہ ہے جسے طلاق کے باوجود بل گیٹس اور ملینڈا فرنچ ابھی تک مل جل کر چلا رہے ہیں۔
امریکی خبر رساں ادارے وائس آف امریکا کے مطابق دونوں شخصیات کے درمیان طے پایا ہے کہ اگر مسقتبل میں اس ادارے کو چلانے کے معاملات پر بھی اختلافات پیدا ہوئے تو ملینڈا اس سے فوری الگ ہو جائیں گی۔
یہ اعلان گیٹس فاؤنڈیشن کی جانب سے جاری ایک اعلامیہ میں کیا گیا ہے۔ اس میں کہا گیا ہے کہ اگر بل اور ملینڈا میں اتفاق نہ پایا گیا تو 2 سال کے عرصے میں ملینڈا استعفیٰ دے دیں گی۔
بیان میں کہا گیا ہے کہ استعفے کی صورت میں ملینڈا فرنچ گیٹس کو بل گیٹس کی جانب سے رقم اور وسائل فراہم کئے جائیں گے تاکہ وہ اپنے فلاحی کاموں کو جاری رکھ سکیں۔
یہ بھی پڑھیں: بل گیٹس نے مائیکرو سافٹ کی ملازمہ سے تعلقات کا اعتراف کر لیا
واضح رہے کہ مائیکروسافٹ کے بانی بل گیٹس اور ان کی اہلیہ میلنڈا کی 27 سال کی شادی کا خاتمہ 3 مئی کو طلاق پر ہوا تھا۔
بل گیٹس نے اعتراف کیا تھا کہ مائیکروسافٹ کی ایک ملازمہ کیساتھ ان کے تعلقات تھے۔ کمپنی کے ترجمان بریجیٹ آرنلڈ نے بتایا تھا کہ بل گیٹس کا ایک معاشقہ لگ بھگ 20 سال پہلے ہوا تھا جس کا اختتام دوستانہ انداز سے ہوا۔ مائیکرو سافٹ بورڈ کی ایک کمیٹی نے اس معاملے کی جانچ پڑتال کی تھی جس کے لیے ایک لا فرم کے ذریعے تحقیقات کی گئی۔
ترجمان کے مطابق اس تحقیقات کے دوران اس معاملے کو اٹھانے والی عہدیدار کو کمپنی کی جانب سے سپورٹ فراہم کی گئی۔ بل گیٹس نے مارچ 2020 میں مائیکرو سافٹ کے بورڈ سے علیحدگی اختیار کی تھی۔
تاہم کمپنی کے ترجمان نے اس بات سے اختلاف کیا کہ شریک بانی کے بورڈ سے الگ ہونے کے فیصلے کا تعلق اس معاشقے کی تحقیقات سے تھا۔ ادھر اس تحقیقات سے آگاہ ایک فرد نے نام چھپانے کی شرط پر بتایا کہ بل گیٹس نے تحقیقات مکمل ہونے سے قبل بورڈ کو چھوڑ دیا تھا۔
خیال رہے کہ اس سے قبل امریکی اخبار وال سٹریٹ جرنل نے انکشاف کیا تھا کہ بل گیٹس کے اپنی کمپنی مائیکرو سافٹ کی خاتون ملازم سے تعلقات تھے، تحقیقات کے باعث بورڈ آف ڈائریکٹر کی حیثیت سے استعفیٰ دیا۔
اخبار کا اپنی رپورٹ میں کہا گیا تھا کہ بورڈ ارکان نے 2020ء میں فیصلہ کیا کہ بل گیٹس کو مستعفی ہو جانا چاہیے۔ ترجمان مائیکروسافٹ کے مطابق 2000ء میں پیش آئے واقعات کا علم 2019ء میں ہوا۔
بورڈ آف ڈائریکٹرز کی ایک کمیٹی نے معاملے کا جائزہ لیا۔ رپورٹ میں بتایا گیا کہ خاتون ملازم نے بھی انکشاف کیا کہ ان کے اور بل گیٹس کے تعلقات برس ہا برس رہے۔
