واشنگٹن:(ویب ڈیسک)امریکا نے فلسطین پر ناجائز طور پر قابض اسرائیل کے خلاف اب تک کا بڑا قدم اٹھاتے ہوئےجاسوسی کے الزام میں اسرائیلی ٹیکنالوجی کمپنی پر پابندیا ں عائد کردی ہیں۔
غیر ملکی میڈیا رپورٹس کے مطابق امریکی صدر جوبائیڈن کی انتظامیہ کی جانب سے کہا گیا کہ اسرائیلی کمپنی NSO گروپ کے اسپائے ویئر ایکٹویسٹ اور صحافیوں کو جبری جاسوسی کا نشانہ بنارہے تھے۔
میڈیا رپورٹس میں بتایا گیا کہ امریکی محکمہ تجارت نے کہا کہ بائیڈن انتظامیہ نے اسرائیلی فرم NSO گروپ کو غیر ملکی حکومتوں کو صحافیوں، ایکٹیوسٹ اور دیگر اہم افراد کی جاسوسی کا اہل بنانے کے سافٹ ویئر فراہم کرنے کا الزام عائد کرتے ہوئے اس پر پابندیاں عائد کردی ہیں جبکہ NSO گروپ کا نام اس انٹیٹی فہرست میں شامل چار کمپنیوں میں سے ایک ہے جن پر امریکی خارجہ پالیسی اور قومی سلامتی کے خلاف سرگرمیوں میں ملوث ہونے کے شواہد ہیں۔
رپورٹس میں مزید کہا گیا کہ امریکا کی جانب سے جاری ہونے انٹیٹی فہرست میں چینی موبائل فون کمپنی ہواوےسمیت ایک اور اسرائیلی کمپنی کیندیرو کا نام بھی شامل ہے۔
یاد رہے کہ گزشتہ سال انٹرنیشنل میڈیا کی جانب سے ہونے والی تحقیقات کے بعد مذکورہ اسرائیلی کمپنی کے Pegasus اسپائے ویئر کو شدید تنقید کا نشانہ بنایا گیا تھا اور اس سے قبل اس سافٹ ویئر کو متعدد ملکوں کی مجاز حکومتیں اور سکیورٹی فورسز اپنے مقاصد کے لئے استعمال میں لارہی تھیں۔
