نیو یارک: (ویب ڈیسک) معروف یوٹیوبر مارک رابر نے خلا سے انڈا پھینکنے کا تجربہ کیا جو امریکی ریاست جنوبی کیلیفورنیا کے علاقے وکٹر ویلی میں جا گرا۔
یوٹیوبر مارک رابر نے یوٹیوب کے اپنے چینل پر ویڈیو شیئر کی جس میں وہ انڈے کو خلاء سے پھینکنے کا تجربہ کرتے ہوئے پائے گئے ہیں۔ ویڈیو میں دیکھا جاسکتا ہے کہ یوٹیوبر کے ساتھ بی پی ایس (وہ مشین جو راکٹ نما گیجٹس کو زمین سے اوپر کی طرف دھکیلتی ہے) کے ماہر جو برنارڈ بھی موجود ہیں جو اس تجربے کیلئے مدد کررہے ہیں۔
انڈے کو خلا میں بھیجنے سے پہلے مارک کی جانب سے زمین پر بھی کچھ تجربے کیے گئے۔ ایک بڑے سے غبارے کے نیچے راکٹ کو نصب کیا اور اس میں انڈے کو حفاظت سے محفوظ کیا گیا جبکہ اس تمام تر تجربے کو ریکارڈ کرنے کیلئے کیمرا اور لوکیشن کا پتا چلنے کیلئے جی پی ایس(GPS) بھی نصب کیا گیا تھا۔
ویڈیو میں صاف دیکھا جا سکتا ہے کہ مارک اور ان کی ٹیم غبارے کا جی پی ایس کی مدد سے پیچھا کرتے ہیں۔ گرنے کا عمل مکمل ہونے کے بعد ٹیم کو انڈے کی لوکیشن وکٹر ویلی میں ملتی ہے۔
واضح رہے تجربے کا تمام عمل کیلیفورنیا کی ایپل ویلی میں کیا گیا۔ یہ تجربہ رواں سال کے آغاز میں کیا گیا تھا تاہم اس کی ویڈیو بلیک فرائیڈے کے موقع پر اپلوڈ کی گئی ہے۔
