مینلوپارک: (ویب ڈیسک) میٹا نے فیس بک اور انسٹاگرام پر شیئر ہونے والی فحش تصاویر اور ویڈیوز ہٹانے کیلئے ’ٹیک اٹ ڈاؤن ‘ نامی ٹول متعارف کروا دیا۔
غیر ملکی میڈیا کے مطابق ’ٹیک اٹ ڈاؤن‘ نامی ٹول ایک فری سروس ہے جو ایک ویب سائٹ کے طور پر کام کرتا ہے، یہ نیا ٹول امریکی ادارے نیشنل سینٹر فارمسنگ اینڈ ایکسپلائیٹڈ چلڈرن کے اشتراک سے متعارف کروایا گیا ہے۔
اس ٹول کا استعمال کرتے ہوئے 18 سال سے کم عمر صارفین یا ان کے والدین ایسی تصاویر اور ویڈیوز کو ویب سائٹ پر ڈال سکتے ہیں جن سے متعلق خدشہ ہو کہ وہ انٹرنیٹ پر شیئر کی جاسکتی ہیں یا پہلے کبھی شیئر کی جاچکی ہیں۔
ان تصاویر اور ویڈیوز کو ٹیک اٹ ڈاؤن ٹول ڈیجیٹل فنگر پرنٹس میں تبدیل کرکے محفوظ کرلے گا اور پھر یہ فنگر پرنٹس ہیش کے نام سے نیشنل سینٹر فار مسنگ اینڈ ایکسپلائیٹڈ چلڈرن کو بھیجے جائیں گے۔
سوشل میڈیا سائٹس پر قابل اعتراض مواد کو بلاک کرنے کیلئے اس ہیش میچ ٹیکنالوجی کا استعمال کیا جائے گا، جب بھی کوئی ان تصاویر کو سوشل میڈیا پر وائرل کرے گا تب یہ ٹول اپنا کام کرتے ہوئے انہیں ہٹا دے گا۔
خیال رہے کہ اس ٹول کی مدد سے صرف 18 سال یا اس سے کم عمر بچوں کی فحش اور عریاں تصاویر کو ہی ہٹایا جاسکے گا، 18 سال سے زائد عمر کے افراد اس سے مستفید نہیں ہو سکیں گے۔
