اسلام آباد: (ویب ڈیسک) ملک بھر میں انٹرنیٹ سروسز کے تعطل پر پاکستان ٹیلی کمیونیکیشن اتھارٹی (پی ٹی اے) کا موقف سامنے آگیا۔
پاکستان ٹیلی کمیونیکیشن اتھارٹی (پی ٹی اے) کی جانب سے سوشل میڈیا پر جاری بیان میں کہا گیا ہےکہ انٹرنیٹ میں جو تعطل آیا اس کی وجہ تکنیکی خرابی تھی۔
پی ٹی اے کا کہنا ہے کہ تکنیکی خرابی کو درست کر کے انٹرنیٹ کو ملک بھر میں مکمل طور پر بحال کر دیا گیا ہے۔
خیال رہے کہ ہفتے کی شام کو ملک میں ایک بار پھر انٹرنیٹ صارفین نے انٹرنیٹ سروسز متاثر ہونے کی شکایات کی تھیں، صارفین کو مختلف سوشل میڈیا سائٹس فیس بک، واٹس ایپ، انسٹاگرام، یوٹیوب اور ایکس تک رسائی میں مشکلات کا سامنا رہا۔
یاد رہے کہ 7 جنوری کی شام کو بھی فیس بک، یوٹیوب اور ایکس سمیت دیگر سوشل میڈیا سائٹس تک رسائی رک گئی تھی جبکہ ویب براؤزنگ کا عمل بھی سست روی کا شکار ہوگیا تھا۔
