اسلام آباد: (دنیا نیوز) نادرا کی سلور جوبلی ، پاکستان میں پہلی بار ڈی مٹیریلائزڈ آئی ڈی کارڈ کا اجرا کر دیا گیا۔
نادرا ہیڈکوارٹرز میں پروقار تقریب کیا گیا، صدر مملکت اور وزیر اعظم کی جانب سے تہنیتی پیغامات پیش کئے گئے۔
صدر مملکت آصف علی زردری نے کہا کہ شہریوں کو قانونی اور محفوظ شناخت کی فراہمی کے لئے نادرا کی خدمات لائق تحسین ہیں، نادرا ریاست اور عوام کے درمیان اعتماد کے رشتے کو مضبوط بنا رہا ہے۔
آصف علی زرداری نے کہا کہ نادرا جدید ٹیکنالوجی کے استعمال کو مزید وسعت دے کر اپنی کارکردگی میں بہتری لائے۔
وزیراعظم شہباز شریف نے کہا کہ نادرا پاکستان، نائجیریا اور کینیا کے شناختی نظام تشکیل دے کر دنیا کی آبادی کے تیسرے بڑے حصے کو خدمات فراہم کر رہا ہے، ٹیکنالوجی کے میدان میں نادرا کی مہارت ملکی معیشت کی ترقی میں بنیادی کردار ادا کرے گی۔
اس موقع پر وفاقی وزیر داخلہ محسن نقوی نے کہا کہ ڈی مٹیریلائزڈ کارڈ، ڈیجیٹل شناخت کی جانب اہم قدم ہے، پاک آئی ڈی موبائل ایپ میں فیچر شامل ہونے کے بعد شہریوں کو سمارٹ فون میں شناختی کارڈ رکھنے کی سہولت میسر ہوگی۔
محسن نقوی نے کہا کہ ڈیجیٹل تصدیقی نظام جلد متعارف کرایا جائے گا، ڈی مٹیریلائزڈ کارڈ کی تصدیق کا مربوط نظام بھی وضع کیا جا رہا ہے، نادرا کے وسیع نیٹ ورک کی بدولت شناختی خدمات آج ہر پاکستانی کی پہنچ میں ہیں۔
وفاقی وزیر داخلہ نے کہا کہ قومی سلامتی اور قانون نافذ کرنے والے اداروں کے لئے نادرا کی معاونت لائق تحسین ہے۔
نادرا کے بانی چیئرمین میجر جنرل (ر) زاہد احسان سلور جوبلی تقریب کے مہمان خصوصی تھے، انہوں نے کہا کہ نادرا بنیادی وژن کو حقیقت کا روپ دیتے ہوئے مسلسل ترقی کی نئی منازل طے کر رہا ہے۔
تقریب میں سپیشل سیکرٹری داخلہ اور نادرا کے سابق چیئرمین صاحبان نے بھی شرکت کی، چیف سٹیٹسٹیشن ادارہ شماریات، ڈائریکٹر جنرل امیگریشن اینڈ پاسپورٹ اور نادرا افسران بھی شریک ہوئے۔
