اسلام آباد: (دنیا نیوز) ملک میں 13 ارب روپے کے منصوبے سے تیز رفتار انٹرنیٹ کی فراہمی شروع ہوگئی۔
ملک میں ہائی اسپیڈ انٹرنیٹ اور ڈیجیٹل سہولیات کے فروغ کے لیے 13 ارب روپے سے زائد مالیت کے 9 میگا پراجیکٹس کی منظوری دے دی گئی ہے،وزارت آئی ٹی اینڈ ٹیلی کمیونیکیشن کے ذیلی ادارے یونیورسل سروس فنڈ (یو ایس ایف) کے بورڈ آف ڈائریکٹرز کے اہم اجلاس میں یہ منصوبے 11 اضلاع کے لیے منظور کیے گئے۔
سیکرٹری آئی ٹی اور چیئرمین یو ایس ایف بورڈ کے مطابق وفاقی وزیر آئی ٹی شزا فاطمہ کی ہدایت پر شہری و دیہی ڈیجیٹل تفریق کے خاتمے کے لیے اقدامات میں تیزی لائی جا رہی ہے، منظور شدہ منصوبوں سے 55 لاکھ سے زائد افراد مستفید ہوں گے جبکہ 11 اضلاع کے 178 ٹاؤنز، یونین کونسلز اور 753 دیہات کو ڈیجیٹل دنیا سے مضبوطی سے جوڑا جائے گا۔
چیئرمین یو ایس ایف بورڈ کا کہنا تھا کہ دیہی و پسماندہ علاقوں میں انٹرنیٹ اور موبائل کنیکٹیویٹی ڈیجیٹل معیشت کو تقویت دے گی، یو ایس ایف کے جاری منصوبوں کے تحت اب تک 3 کروڑ 94 لاکھ دیہی باشندے کنیکٹیویٹی خدمات تک رسائی حاصل کر چکے ہیں۔
منظور شدہ منصوبوں میں سیالکوٹ، نارووال، زیارت اور کوئٹہ کے لیے 3 فائبر آپٹک منصوبے شامل ہیں جن کے تحت 1428 کلومیٹر کیبل بچھائی جائے گی، اسی طرح عمرکوٹ، گوجرانوالہ، کوہاٹ، خضدار، مظفرگڑھ، مانسہرہ اور منڈی بہاءالدین کے لیے براڈ بینڈ خدمات کے چھ منصوبوں کی منظوری بھی دی گئی۔
اجلاس میں چیئرمین پی ٹی اے میجر جنرل حفیظ الرحمان، ممبر ٹیلی کام جہانزیب رحیم، محمد یوسف اور عائلہ ماجد سمیت دیگر حکام نے شرکت کی۔
