لندن : (ویب ڈیسک) برطانیہ سے تعلق رکھنے والے عادی مجرم نے 668 ویں بار بھی جرم کیا ہے جو بذاتِ خود ایک ریکارڈ ہے۔ پیٹرک نے پہلا جرم 14 سال کی عمر میں کیا، اب تک 23 برس جیلوں میں گزارے۔ ریان کا مجرمانہ ریکارڈ اتنا طویل ہے کہ اسے لکھنے کے لیے ایک پورا رجسٹر درکار ہوگا۔
برطانوی میڈیا کے مطابق 62 سالہ پیٹرک ریان نے پہلا جرم 14 برس کی عمر میں کیا تھا اور اب تک وہ مجموعی طور پر 23 برس مختلف جیلوں میں گزار چکے ہیں۔ یہاں تک کہ اپنی 50 ویں سالگرہ پر بھی وہ جیل میں ہی تھے۔ حال ہی میں انہوں نے 668 واں جرم کیا ہے جس کی پاداش میں انہیں 18 ماہ قید کی سزا سنائی گئی ہے۔
ریان کا مجرمانہ ریکارڈ اتنا طویل ہے کہ اسے لکھنے کے لیے ایک پورا رجسٹر درکار ہوگا اور لنکا شائر پولیس نے ریان کا ریکارڈ پرنٹ نہ کرنے کا مشورہ دیتے ہوئے اسے نہ چھاپنے کا مشورہ دیا ہے کیونکہ اس میں کاغذ ضائع ہوتے ہیں۔ وہ اب تک 3 ملین برطانوی پاؤنڈ کا نقصان بھی کرچکے ہیں اور 62 سال کی عمر میں بھی پیٹرک سدھرنے کا کوئی ارادہ نہیں رکھتے۔
تازہ واردات میں انہوں نے 24 اپریل کو نہ صرف چلتی بس میں پیشاب کر دیا بلکہ ایک خاتون مسافر سے سخت بدتمیزی کی۔ اس کے بعد وہ دوسری بس میں چڑھا اور وہاں بھی پیشاب کر دیا۔ گرفتاری کے بعد جج نے اسے فوراً جیل بھیج دیا۔
ریان فراڈ، چوری، خواتین پر جنسی حملوں، فساد اور جھگڑوں کی طویل فہرست رکھتے ہیں۔ اسی بنا پر جج نے انہیں فوری طور پر ڈیڑھ سال کی سزا دے کر جیل بھیج دیا۔ اس دوران ان کی دماغی کیفیات کا جائزہ لیا جائے گا اور شراب نوشی چھڑانے کے جتن کیے جائیں گے۔ اگر پیٹرک ریان کا نام گوگل پر سرچ کیا جائے تو اس کی طویل فہرست سامنے آتی ہے۔ دلچسپ بات یہ ہے کہ وہ جیل سے رہا ہونے کے تین روز بعد ہی دوبارہ گرفتار ہوئے ہیں۔
