پیرس: (روزنامہ دنیا) فرانسیسی ریاضی دان اور منطق کے ماہر نے پاکستان میں واقع حیرت انگیز پہاڑ کے ٹو کو ریاضی کا عمدہ نمونہ اور ایک ایسا شاہکار قرار دیا ہے جو ہر لحاظ سے ایک مکمل اہرام ہے۔
فرانس میں کئی جامعات سے وابستہ ڈینیئل پروشیا نے فرانسیسی زبان میں اس موضوع پر اپنی کتاب بھی تحریر کی ہے۔ دی کیس آف کے ٹو نامی کتاب میں ڈینیئل نے کہا ہے کہ کے ٹو پہاڑ فطرت کا ایک شاہکار تو ہے ہی تاہم یہ ریاضی کا بھی ایک نمونہ ہے اور ایک خوبصورت اہرام کی صورت میں دکھائی دیتا ہے۔
اپنی کتاب میں انہوں نے کے ٹو کے ریاضیاتی پہلوؤں پر بات کی ہے جو قراقرم سلسلے کی سب سے اونچی اور دنیا کی دوسری بلند ترین چوٹی بھی ہے۔ اپنی کتاب میں مصنف نے کے ٹو پہاڑ کو سرکرنے کے حوالے سے مشکل ترین قرار دیا، اس کی وجہ انہوں نے بلندی نہیں بلکہ خطرناک ڈھلانیں بیان کی ہیں۔ اب تک کے ٹو 85 باعزم کوہ پیماؤں کی جان لے چکا ہے۔ ڈینیئل نے 8611 میٹر بلند پہاڑ کو ایک ٹھوس تکون قرار دیا ہے جو قدرتی اہرام کی ایک شکل ہے۔
