کیلیفورنیا: (ویب ڈیسک) باڈی بلڈنگ کا شوق رکھنے والے امریکی شخص نے اپنے جسم کے خدوخال کو ماسٹر روشی سے شباہت دینے کے لیے دن رات محنت کی اور بالآخر ثمر پالیا۔
بین الاقوامی خبر رساں ادارے کے مطابق خود کو کارٹون کریکٹر کی طرح ڈھالنے والا مداح کوئی کم عمر لڑکا یا طالب علم نہیں بلکہ ایک 55 سالہ شخص ہے۔
یوں تو امریکی شخص جو اپنا تعارف ماسٹر روشی کے نام سے ہی کرانا پسند کرتے ہیں نوجوانی سے ہی باڈی بلڈنگ کے دلدادہ تھے تاہم ماسٹر روشی بننے کے لیے انہیں کچھ زیادہ کرنے کی ضرورت کرنی تھی۔ جس میں 5 گھنٹے کی جم، پروٹین سے بھرپور غذا اور ایک گھنٹے تک مسلسل دوڑے جانا شامل ہے۔
ڈریگن بال زی کے مداح سوشل میڈیا پر امریکی شخص کی تصاویر اور ویڈیوز دیکھ کر حیران رہ گئے۔ ہزاروں لوگوں نے ان کے سوشل میڈیا اکاؤنٹس کو جوائن کیا اور تعریفوں کے پل باندھ دیئے۔ امریکی شخص سوشل میڈیا پر لوگوں کو ٹپس بھی دیتے ہیں۔
جاپانی کارٹون کریکٹر ماسٹر روشی ایک مقبول کریکٹر ہے جس نے ایک عرصے تک اپنے مداحوں کے دلوں پر راج کیا ہے۔ کچھوے کے جوگی کے نام سے مشہور یہ کریکٹر حیرت انگیز کمالات دکھاتا اور اپنی طاقت کا مظاہرہ کرتا نظر آتا ہے۔ جس کی وجہ سے اس کریکٹر کی شہرت جاپان سے نکل کر دنیا کے کونے کونے میں پھیل گئی تھی۔
