جکارتہ: (ویب ڈیسک) انڈونیشیا میں بحریہ کی ایک آبدوز جنگی مشقوں کے دوران لاپتہ ہو گئی ہے۔ آبدوز میں 53 اہلکار سوار ہیں۔
برطانوی خبر رساں ادارے کی رپورٹ کے مطابق حکام نے بتایا کہ لاپتہ ہو جانے والی آبدوز کی تلاش کا کام شروع کر دیا گیا ہے جس پر انڈونیشیا کی بحریہ کے 53 اہلکار سوار ہیں۔ یہ آبدوز بالی کے جزیرے کے شمال میں جنگی مشقیں کر رہی تھی لیکن ان مشقوں کے نتائج کے سلسلے میں اس کا حکام سے رابطہ منقطع ہو گیا۔
انڈونیشیا کی فوج کے سربراہ نے کہا ہے کہ جنگی جہازوں کو اس کی آر آئی ننگالہ 402 آبدوز کی تلاش کے لیے روانہ کر دیا گیا ہے۔
انڈونیشیا کے حکام نے آسٹریلیا اور سنگاپور سے بھی آبدوز کی تلاش میں مدد کرنے کی اپیل کی ہے۔ ان ملکوں کی طرف سے اس بارے میں ابھی تک کچھ نہیں کہا گیا ہے۔
غیر ملکی میڈیا کے مطابق جرمن ساخت کی آبدوز بالی کے جزیرے سے 60 میل کے فاصلہ پر سمندر میں لاپتہ ہے۔
انڈونیشیا کی بحریہ کے ایڈمرل جولیس وڈجونو نے فرانسیسی خبررساں ادارے کو بتایا کہ بحریہ تلاش کا کام کر رہی ہے۔ ہمیں معلوم ہے کہ اس جگہ سمندر بہت گہرا ہے۔
اطلاعات کے مطابق اس آبدوز سے اس وقت رابطہ منقطع ہو گیا جب اسے زیادہ گہرائی میں جانے کی اجازت دی گئی۔ انڈونیشیا کی پانچ میں سے یہ ایک آبدوز ہے۔
رائٹرز کے مطابق اس آبدوز کو 1970 کی دہائی کے آخری برسوں میں بنایا گیا تھا جس کے بعد 2012 میں اس کی جنوبی کوریا میں دو سال تک مرمت کی گئی۔
