واشنگٹن: (دنیا نیوز) امریکا نے عمران خان کے الزامات کو ایک بار پھر جھوٹ اور پروپیگنڈا قرار دے دیا، ترجمان امریکی محکمہ خارجہ نیڈ پرائس نے کہا کہ پاکستان کے ساتھ تعلقات کی قدر کرتے ہیں، پروپیگنڈے اورجھوٹ کو تعلقات کی راہ میں رکاوٹ نہیں بننے دیں گے۔
ترجمان امریکی محکمہ خارجہ نیڈ پرائس سے نیوز بریفنگ کے دوران پوچھا گیا کہ کیا عمران خان کے الزامات سے دوطرفہ تعلقات میں دراڑ آرہی ہے۔ نیڈ پرائس نے کہا کہ پروپیگنڈا اور جھوٹ کو تعلقات کی راہ میں رکاوٹ نہیں بننے دیں گے۔ انہوں نے کہا کہ وزیر خارجہ ٹونی بلنکن کی نئے پاکستانی ہم منصب سے6 مئی کو گفتگو ہوئی، دونوں رہنماؤں نے تعاون کو مزید مضبوط بنانے پر بات کی۔
ترجمان نے بتایا کہ امریکی وزیر خارجہ نے بلاول کے ساتھ ملاقات میں افغان استحکام اور دہشت گردی سے نمٹنے کے لیے امریکا اور پاکستان کے پختہ عزم پر زور دیا۔ باہمی اقتصادی تعلقات، تجارت ، سرمایہ کاری، آب و ہوا، توانائی، صحت اور تعلیم کے حوالے سے جاری مصروفیات پر بھی تبادلہ خیال کیا۔
نیڈ پرائس کا مزید کہنا تھا کہ پاکستان اور امریکا کے مابین وسیع بنیادوں پر دوطرفہ تعلقات ہیں۔
