جینیوا: (ویب ڈیسک ) اقوام متحدہ نے کہا ہے کہ بڑھتی ہوئی علاقائی کشیدگی میں یمن پر اسرائیلی حملوں پر گہری تشویش ہے، ان حملوں میں مبینہ طور پر 6 افراد ہلاک اور 80 سے زائد زخمی ہوئے ۔
خبر رساں ادارے کے مطابق عالمی ادارے کے سیکرٹری جنرل انتونیو گوتریس نے یمن کے بندرگاہ کے حامل شہر الحدیدہ پر اسرائیل کے فضائی حملوں پر ردعمل کا اظہار کیا ہے ، اس حملے میں مبینہ طور پر کم از کم چھ افراد ہلاک اور 80 سے زائد زخمی ہوئے۔
سیکرٹری جنرل نے تنازع میں شامل تمام فریقوں سےتحمل سے کام لینے کی اپیل کرتے ہوئے کہاکہ اسرائیل نے ان حملوں کی ذمہ داری قبول کی ہے جو ہفتے کے روز کیے گئے ، اس جنگ نے پہلے ہی یمن میں صحت کی دیکھ بھال سمیت بیشتر شعبوں کو تباہ کر دیا ہے اور یہ دنیا کے بدترین انسانی بحرانوں میں سے ایک ہے۔
انہوں نے کہاکہ یمن کی نصف آبادی( تقریباً 18.2 ملین افراد )کو کسی نہ کسی شکل میں مدد کی ضرورت ہے۔
