زولنگن: (دنیا نیوز) جرمن شہر زولنگن میں میلے کے دوران ایک شخص نے اندھا دھند چاقو سے حملے کرکے تین افراد کو ہلاک اور 4 کو زخمی کردیا۔
خبر ایجنسی کے مطابق جرمنی کے مغربی شہر میں یہ واقعہ تقریباً پونے دس بجے شب پیش آیا، ملزم کو تاحال گرفتار نہیں کیا جاسکا، چاقو زنی ایک مارکیٹ میں کی گئی جہاں پر موسیقی کا پروگرام جاری تھا، حملے کی اطلاع پر پولیس اور دیگر امدادی ٹیمیں موقع پر پہنچ گئیں اور زخمیوں کو ہسپتال منتقل کردیا گیا۔
ڈیڑھ لاکھ آبادی پر مشتمل یہ چھوٹا شہر زولنگن کولون اور ڈوزلڈورف کے قریب واقع ہے، اس شہر کی 650 ویں سالگرہ کی مناسبت یہ میلہ اتوار تک جاری رہنا تھا تاہم چاقو زنی کے واقعہ کے بعد علاقے کو خالی کرالیا گیا۔
حکام کے مطابق زخمیوں میں سے بعض کی حالت تشویش ناک ہے جبکہ ملزم کی تلاش کیلئے کارروائیاں کی جارہی ہیں۔
