بیروت: (دنیا نیوز) حزب اللہ نے لبنان کے جنوبی علاقوں میں داخل ہونے کے اسرائیلی افواج کے دعوے کو مسترد کردیا۔
غیر ملکی میڈیا کے مطابق حزب اللہ کے میڈیا کوآرڈینیٹر محمد عفیف نے بتایا کہ تمام صہیونی دعوے کہ قابض اسرائیلی افواج لبنان میں داخل ہوگئی ہیں، مکمل طور پر غلط اور بے بنیاد ہیں۔
محمد عفیف نے مزید کہا کہ ابھی تک جنوبی لبنان میں حزب اللہ اور قابض اسرائیلی افواج کے درمیان دوبدو جھڑپیں نہیں ہوئیں۔ اس حوالے سے اسرائیلی دعوے جھوٹ کے سوا کچھ نہیں۔
حزب اللہ کے میڈیا کوآرڈینیٹر نے ایک سوال کے جواب میں کہا کہ لبنان کی سرحد عبور کرنے کی کوشش یا ہمت کرنے والی دشمن قوتوں سے ہمارے جانباز مردانہ وار مقابلہ کرنے کے لیے تیار ہیں۔
یاد رہے کہ اسرائیل نے دعویٰ کیا تھا کہ اس کی بری افواج ٹینکوں کے ذریعے لبنان کے جنوبی علاقوں میں داخل ہوگئے اور وہاں محدود پیمانے پر چھاپا مار کارروائی رہی ہیں۔
اسرائیلی فوج نے یہ دعویٰ بھی کیا تھا کہ مضافاتی علاقے میں 3 دیہاتوں کو خالی کروا کر ملٹری آپریشن کیا گیا جو ہدف کے حصول تک جاری رہے گا۔
