نیویارک، جنیوا : (دنیا نیوز) بھارتی میڈیا کا جنگی جنون میں مبتلا ہو کر پاکستان مخالف جھوٹی خبریں پھیلانے کا اوچھا ہتھکنڈا امریکی اخبار نیویارک ٹائمز اور ڈچ اخبار پولیٹیکن میں بھی بے نقاب ہو گیا، بین الاقوامی میڈیا نے قرار دیا کہ بھارتی میڈیا نے ہیرا پھیری کرتے ہوئے گمراہ کن پراپیگنڈا کیا۔
بھارتی صحافیوں نے چیئر لیڈرز کا کردار ادا کیا: نیویارک ٹائمز
نیویارک ٹائمز کے مطابق پاک بھارت جنگ کے دوران بھارتی میڈیا نے جھوٹا پروپیگنڈا پھیلایا، بھارتی میڈیا کے مطابق بھارت نے حملوں میں پاکستانی ایٹمی تنصیبات کو نشانہ بنایا، 2 پاکستانی لڑاکا طیارے مار گرائے اور کراچی کی بندرگاہ کے ایک حصے کو دھماکے سے اڑا دیا۔
نیو یارک ٹائمز کے مطابق بھارتی میڈیا کی معلومات کا کوئی بھی حصہ درست نہیں تھا، بھارتی میڈیا نے پاکستان کے خلاف گمراہ کن ویڈیو فوٹیج اور مصنوعی ذہانت سے ہیرا پھیری کر کے جھوٹ پھیلایا۔
نیو یارک ٹائمز نے قرار دیا ہے کہ جھوٹ کو پھیلانے میں بھارتی میڈیا کےمین سٹریم چینلز بھی شامل ہیں، بھارتی میڈیا کو خبریں بریک کرنے کا بخار چڑھ گیا ہے۔
نیویارک ٹائمز کے مطابق بھارتی اینکرز اور مبصرین نے 2 جوہری ریاستوں کے درمیان جنگ کے لیے چیئر لیڈرز کا کردار کیا، کچھ مشہور بھارتی ٹی وی چینلز نےقوم پرستی کےجوش میں من گھڑت کہانیاں نشر کیں۔
نیو یارک ٹائمز کے مطابق بھارتی خبر رساں اداروں نے تو پاکستانی جوہری تنصیبات سے تابکاری کے اخراج کی خبر نشر کر دی، اس کے علاوہ بھارتی میڈیا نے بغیر ثبوتوں کے حملے کی جگہ کی نشاندہی کے لیے تفصیلی نقشے بھی دکھائے۔
بھارتی میڈیا نے ذمہ دار صحافت پامال کر دی: پولیٹیکن
ہالینڈ کے مشہور اخبار پولیٹیکن نے لکھا ہے کہ بھارتی میڈیا نے پاک بھارت کشیدگی کے دوران جھوٹی رپورٹس پھیلائیں جس سے ذمہ درانہ صحافت کے بارے میں تشویش پیدا ہوگئی۔
پولیٹیکن کے مطقابق ممتاز بھارتی میڈیا چینلز نے دعویٰ کیا کہ بھارت نے پاکستان پر تباہ کن حملے کیے، بھارتی نیوی نے کراچی پر حملہ کیا اور اسلام آباد کو قبضہ میں لیا گیا جیسی سرخیاں چلائی گئیں جو بعد میں بالکل جھوٹی ثابت ہوئیں۔
اخبار کے مطابق بھارت کے کئی بڑے میڈیا اداروں نے دہشت گرد کارروائیوں کے بارے میں بھی پرجوش کہانیاں نشر کیں، تحقیقات اور حقائق کی جانچ پڑتال سے معلوم ہوا ہے کہ ان میں سے بہت سی رپورٹس جعلی یا بہت حد تک گمراہ کن تھیں اور اکثر پرانے اور دیگر تنازعات جیسے غزہ کی جنگ کی تصاویر نشر کی گئیں۔
سب سے زیادہ تشویشناک پہلو یہ تھا کہ ان غلط معلومات کا اثر معصوم شہریوں پر پڑا اور غیرضروری دشمنی کو بڑھاوا دیا گیا، بھارتی میڈیا نے ذمہ دار صحافت پامال کر دی۔
