واشنگٹن: (دنیا نیوز) امریکی صدر ڈونلڈ ٹرمپ نے سابق امریکی نائب صدر اور صدارتی انتخابات میں اپنی مدمقابل کملا ہیرس پر الزام لگاتے ہوئے تحقیقات کا اعلان کر دیا۔
امریکی صدر ڈونلڈ ٹرمپ نے اپنے سوشل میڈیا پلیٹ فارم پر لکھا کہ کملا ہیرس نے 2024 کے انتخابات میں مشہور شخصیات کی حمایت حاصل کرنے کے لیے پیسے دیئے۔
ڈونلڈ ٹرمپ نے لکھا کہ کسی امیدوار کو حمایت خریدنے کی اجازت نہیں لیکن کملا ہیرس نے یہ کام تفریح کے نام پر کیا۔
امریکی صدر نے امریکی گلوکار بروس اسپرنگسٹین پر بھی تنقید کرتے ہوئے سوال اٹھایا کہ کملا ہیرس نے بروس کو کتنے پیسے دیئے اور انہوں نے کیوں قبول کیے؟۔
واضح رہے کہ 2024 کے امریکی صدارتی انتخابات میں ڈیموکریٹ امیدوار کملا ہیرس کو انتخابی مہم میں بیونسے، اوپرا ونفرے اور بروس اسپرنگسٹین جیسے ستاروں کی حمایت حاصل تھی۔
