غزہ: (دنیا نیوز) حماس نے غزہ جنگ بندی معاہدے کیلئے اپنا جواب ثالث کاروں کو بھیج دیا۔
خبر ایجنسی کے مطابق حماس کا جواب قطری اور مصری ثالثوں کی امیدوں پر پورا نہیں اترتا، ثالث کاروں نے حماس سے نظر ثانی شدہ جواب جمع کرانے کا مطالبہ کر دیا، اسرائیلی حکام کو سرکاری طورپر جواب موصول نہیں ہوا۔
واضح رہے کہ اسلامی تعاون تنظیم نے بھی عالمی برادری سے مطالبہ کیا ہے کہ غزہ میں فوری جنگ بندی کروائی جائے، اعلامیہ میں او آئی سی کا کہنا ہے کہ اقوام متحدہ غزہ میں فوری جنگ بندی کے لیے عملی اقدامات کرے، غزہ میں امدادی سامان کی بلا تعطل فراہمی کو یقینی بنایا جائے، غزہ میں اسرائیلی محاصرہ فوری طور پر ختم کروایا جائے۔
اسلامی تعاون تنظیم کا مزید کہنا تھا کہ اسرائیل غزہ میں بھوک کو ہتھیار کے طور پر استعمال کر رہا ہے، یہ جنگی جرم ہے، عالمی عدالت اسرائیل کے جنگی جرائم کی شفاف اور غیر جانبدارانہ تحقیقات یقینی بنائے، اسرائیل کو انصاف کے کٹہرے میں لایا جائے۔
او آئی سی اعلامیہ میں واضح کیا گیا تھا کہ مسئلہ فلسطین کا پائیدار حل صرف دو ریاستی حل میں مضمر ہے، اسلامی ممالک اسرائیلی مظالم کو عالمی سطح پر بے نقاب کریں۔
