پیرس: (ویب ڈیسک) فرانس نے امریکا کے سفیر چارلس کشنر کو فرانسیسی صدر پر یہود دشمنی کا الزام لگانے پر طلب کیا ہے۔
وال سٹریٹ جرنل میں شائع ہونے والے کھلے خط میں امریکی سفیر چارلس کشنر نے فرانسیسی صدر ایمانویل میکرون پر الزام لگایا تھا کہ فرانس یہودی مخالف تشدد روکنے میں ناکام رہا ہے، فرانس کی جانب سے اسرائیل پر تنقید اور فلسطینی ریاست کو تسلیم کرنے کے اقدامات کو یہودی مخالف رویہ بھی قرار دیا۔
فرانسیسی وزارتِ خارجہ نے ان الزامات کو سختی سے مسترد کرتے ہوئے انہیں ناقابلِ قبول اور داخلی معاملات میں مداخلت قرار دیا، فرانس یہودی مخالف تعصب کے خلاف پوری طرح پرعزم ہے اور ایسے الزامات دونوں ممالک کے تعلقات کو متاثر کرتے ہیں۔
امریکی محکمۂ خارجہ نے اپنے سفیر کا دفاع کرتے ہوئے کہا کہ کشنر فرانس میں امریکی حکومت کے مفادات کے فروغ کے لیے بہترین کردار ادا کر رہے ہیں۔
یہ واقعہ ایک ایسے وقت میں سامنے آیا ہے جب فرانس اور دیگر یورپی ممالک فلسطینی ریاست کو تسلیم کرنے کے اعلانات کر چکے ہیں، جس پر اسرائیل اور اس کے قریبی اتحادی امریکا نے سخت ردعمل دیا ہے۔
