غزہ: (ویب ڈیسک) غزہ میں نسل کشی کی مہم کو سات سو دن مکمل ہوگئے،قابض صہیونی فورسز کی تازہ کارروائی میں مزید 68 فلسطینی شہید ہوگئے۔
صیہونی فوج غزہ سے فلسطینیوں کا نام و نشان مٹانے کے مشن پر ہے، شہداء کی مجموعی تعداد 64 ہزار 368 ہوگئی، اسرائیلی فوج نے تازہ حملے سکول اور خیمہ بستی پر کیے۔
دوسری جانب حماس نےغزہ میں جنگ بندی سے متعلق اپنے نئے بیان میں کہا کہ ہم18اگست کو پیش کی گئی جنگ بندی کی تجویز پر قائم ہیں،غزہ میں مکمل جنگ بندی،اسرائیلی فوج کے انخلا پربات کرنے کیلئے تیار ہیں، ہم ہراُس تجویز کیلئے تیار ہیں،جو بغیر شرط امداد کی فراہمی کا باعث بنے، سنجیدہ مذاکرات کے ذریعے قیدیوں کا تبادلہ یقینی بنایا جائے۔
ادھر اسرائیلی فوج نے اعلان کیا ہے کہ غزہ شہر کے فلسطینی باشندے جنوب کی طرف نکل جائیں کیونکہ اس کی افواج غزہ کی سب سے بڑی شہری بستی میں مزید اندر تک بڑھ رہی ہیں۔
اسرائیلی فوج نے غزہ سٹی کے رہائشیوں کو شہر خالی کرنے کا انتباہ جاری کرتے ہوئے ایک بلند و بالا رہائشی عمارت کو فضائی حملے میں تباہ کر دیا، فوج کو حکم دیا گیا ہے کہ وہ غزہ کے سب سے بڑے شہر پر مکمل قبضہ حاصل کرے۔
فوجی ترجمان افیخائے ادرعی نے سوشل میڈیا پراعلان کیا ہے کہ شہری خان یونس کے ساحلی علاقوں میں منتقل ہو جائیں، جہاں انہیں خوراک، طبی امداد اور پناہ فراہم کی جائے گی، اس علاقے کو انسانی ہمدردی کا زون قرار دیا گیا ہے۔
واضح رہے کہ اس انسانی ہمدردی کے زون کو اسرائیل کے ہی انسانی حقوق کے ماہرین بھیانک قید خانہ قرار دے چکے ہیں۔
فلسطینیوں کا کہنا ہے کہ جس بلند عمارت کو تباہ کیا گیا وہ بے گھر شہریوں کے لیے پناہ گاہ کے طور پر استعمال ہو رہی تھی جبکہ حماس نے اس بات کی تردید کی ہے کہ اس عمارت کا کوئی عسکری استعمال ہو رہا تھا۔
ادھر اسرائیلی وزیر دفاع اسرائیل کاٹز نے عمارت کی تباہی کی ویڈیو شیئر کی، جس میں دیکھا جا سکتا ہے کہ کئی منزلہ ٹاور ایک زور دار دھماکے کے بعد ملبے کا ڈھیر بن گیا۔
اسرائیلی فوج کا کہنا ہے کہ غزہ سٹی میں حماس کا گڑھ ہے اور اس پر قبضہ حماس کو شکست دینے کے لیے ناگزیر ہے، جبکہ وزیر اعظم نیتن یاہو نے فوج کو ہر صورت میں شہر پر کنٹرول حاصل کرنے کا حکم دیا ہے۔
ایمنسٹی انٹرنیشنل نے اسرائیل پر زور دیا ہے کہ وہ غزہ سٹی پر حملے فوری بند کرے اور فلسطینیوں کی جبری نقل مکانی کو روکے، حالیہ دنوں میں ہونے والے حملوں میں درجنوں عام شہری ہلاک اور کئی گھر تباہ کیے گئے ہیں۔
اسرائیلی حکام کے مطابق فوج اس وقت غزہ کے 75 فیصد علاقے پر کنٹرول حاصل کر چکی ہے جبکہ غزہ سٹی کے مرکزی حصے سے چند کلومیٹر کے فاصلے تک پہنچ چکی ہے۔
