واشنگٹن: (دنیا نیوز) امریکا نے خلیجی ممالک سے رابطہ کیا اور غزہ میں جنگ کے بعد انتظامی امورپر تبادلہ خیال کیا۔
اسرائیل میں امریکی سفیر مائیک ہکابی نے گفتگو کرتے ہوئے کہا کہ غزہ میں عبوری حکومت کیلئے کوششیں جاری ہیں، غزہ کے معاملات کو امریکا براہ راست کنٹرول کرے گا، غزہ کے مستقبل سے متعلق فیصلہ بعد میں ہوگا۔
واضح رہے کہ جنرل اسمبلی نے اپنی 80 ویں نشست کے دوران فلسطین کی شمولیت کے حوالے سے ایک اہم قرارداد منظور کر لی گئی ہے، اقوام متحدہ کی جنرل اسمبلی میں فلسطین کی شمولیت کی قرارداد کے حق میں 145 ووٹ، مخالفت میں 5 ووٹ آئے جبکہ 6 رکن ممالک نے رائے شماری میں حصہ نہیں لیا، قرارداد میں فلسطین کی اقوام متحدہ کی سرگرمیوں میں بامعنی شرکت کے لئے طریقہ کار وضع کیا گیا ہے۔
قرارداد میں فلسطینی صدر یا دیگر اعلیٰ نمائندوں کو جنرل اسمبلی کے مباحثے، اعلیٰ سطح کی کانفرنسوں اور دیگر متعلقہ اجلاس میں پیشگی ریکارڈ شدہ بیانات جمع کرانے کی اجازت دی گئی ہے، اسی طرح فلسطینی حکام کی ممکنہ صورت میں ذاتی حیثیت میں شرکت کو بھی یقینی بنایا جائے گا۔
خیال رہے کہ یہ پیش رفت فلسطین کی بین الاقوامی سطح پر سیاسی اور سفارتی موجودگی کو مزید مضبوط بنانے کے طور پر دیکھی جا رہی ہے۔
