نیویارک: (ویب ڈیسک) کینیا کے صدر ولیم رُتو نے غزہ میں جاری تباہ کن صورتحال پر شدید تشویش کا اظہار کیا۔
عالمی میڈیا کی رپورٹ کے مطابق کینیا کے صدرولیم رتو نے اقوام متحدہ کی جنرل اسمبلی کے اجلاس سے خطاب میں کہا کہ عام شہریوں کو درپیش مصائب اور انسانی المیہ پوری دنیا کے لئے تشویش کا باعث ہے، غزہ میں انسانی تباہی اور عام شہریوں کی مشکلات پر سخت فکرمند ہیں جو اسرائیلی فوجی کارروائیوں کی وجہ سے بے پناہ تکالیف میں مبتلا ہیں۔
صدر ولیم رتو نے کہا کہ کینیا اسرائیلی یرغمالیوں کی غیر مشروط رہائی کا مطالبہ کرتا ہے جو افریقی یونین اور اقوام متحدہ کی قراردادوں کے عین مطابق ہے، انہوں نے عالمی برادری پر زور دیا کہ فوری اور مستقل جنگ بندی قائم کی جائے، بین الاقوامی انسانی قوانین پر سختی سے عمل کیا جائے اور ایک قابلِ اعتماد سیاسی عمل کا آغاز کیا جائے۔
ان کا مزید کہنا تھا کہ صرف انہی اقدامات کے ذریعے فلسطین کے دو ریاستی حل کے خواب کو حقیقت میں بدلا جا سکتا ہے۔
