ریاض: (دنیا نیوز) سعودی عرب کے فرمانروا شاہ سلمان بن عبدالعزیز نے ولی عہد شہزادہ محمد بن سلمان کی تجویز پر شیخ ڈاکٹر صالح بن فوزان کو مفتی اعظم مقرر کر دیا۔
عرب میڈیا رپورٹ کے مطابق خادم الحرمین شریفین اور فرمانروا کی منظوری کے بعد شیخ صالح بن فوزان بن عبداللہ الفوزان کو مفتی اعظم سعودی عرب مقرر کرنے کا شاہی حکم نامہ جاری کردیا گیا، شاہی حکم نامے میں بتایا گیا ہے کہ شیخ ڈاکٹر صالح کو سینئر علما کونسل کا چیئرمین، جنرل پریزیڈنسی آف سائنٹیفک ریسرچ اینڈ افتا کا سربراہ بھی مقرر کیا گیا ہے۔
سعودی عرب کے سابق مفتی اعظم شیخ عبد العزیز آل شیخ 23 ستمبر 2025ء کو انتقال کرگئے تھے، وہ 1999ء سے مفتی اعظم سعودی عرب کے عہدے پر فائز تھے، شیخ عبدالعزیز نے اعلیٰ ترین مذہبی سکالر کے طور پر خدمات بھی انجام دیں، اس کے علاوہ انہوں نے شریعت کی تشریح اور قانونی و معاشرتی امور پر اہم فتوے بھی جاری کیے تھے۔
