ہانگ کانگ: (دنیا نیوز) ہانگ کانگ میں کثیر المنزلہ رہائشی عمارت میں لگنے والی آگ سے ہونے والی ہلاکتوں کی تعداد 36 ہوگئی ہے۔
غیر ملکی خبر ایجنسی کے مطابق آگ کی شدت میں مسلسل اضافہ ریکارڈ کیا جا رہا ہے، آگ نے چاروں ٹاورز کو لپیٹ میں لے لیا ہے جہاں سیکڑوں لوگ عمارت کے اندر محصور ہو چکے ہیں، ریسکیو کی ٹیمیں آگ بجھانے کی کوششوں میں مصروف ہیں۔
رہائشی عمارت میں لگی آگ کو 11 گھنٹے گزر چکے ہیں، پولیس کے مطابق متعدد افراد عمارت میں ابھی بھی پھنسے ہوئے ہیں جنہیں نکالنے کی کوشش جاری ہے جبکہ 700 کے قریب افراد کو عارضی پناہ گاہوں میں منتقل کر دیا گیا ہے۔
رہائشی کمپلیکس 8 بلاکس پر مشتمل ہے جس کی ہر عمارت 31 منزلہ ہے اور یہاں مجموعی طور پر لگ بھگ 2 ہزار اپارٹمنٹس اور تقریباً 5 ہزار کے قریب افراد رہائش پذیر ہیں، چینی صدر شی جن پنگ نے ہلاکتوں پر اظہار افسوس کرتے ہوئے امدادی کارروائیاں تیز کرنے کی ہدایت کی ہے۔
