لندن: (ویب ڈیسک)برطانوی اخبار دی ٹیلی گراف نے دعویٰ کیا ہے کہ امریکا ایران میں سائبر حملوں کی تیاری کر رہا ہے۔
برطانوی اخبار کی رپورٹ کے مطابق ٹرمپ انتظامیہ ایران میں سیکڑوں مظاہرین کے خلاف کریک ڈاؤن کے ردِعمل میں ممکنہ سائبر حملوں کی تیاری کر رہی ہےم رپورٹ کے مطابق امریکی حکام کا کہنا ہے کہ ایران کی قیادت کو مظاہرین کے خلاف تشدد پر سزا دینے کے لیے سائبر آپریشنز کی منصوبہ بندی جاری ہے۔
ٹیلی گراف نے امریکی عہدیداروں کے حوالے سے بتایا کہ مجوزہ سائبر کارروائیاں تہران کی جانب سے احتجاجی مظاہروں کو دبانے کے لیے طاقت کے استعمال کے جواب میں کی جا رہی ہیں۔
امریکی میڈیا رپورٹس کے مطابق صدر ٹرمپ کو فوجی کارروائی کے مختلف آپشنز پیش کیے گئے ہیں، تاہم حکام نے خبردار کیا ہے کہ اس مرحلے پر براہِ راست فوجی حملہ قبل از وقت ہو سکتا ہے۔
یہ بھی پڑھیں: جنگ اور مذاکرات کیلئے تیار، غیرملکی عناصر کے بھڑکائے حالات پر قابو پا لیا: ایران
رپورٹس میں بتایا گیا ہے کہ منگل کے روز امریکی حکام صدر ٹرمپ کو غیر مہلک اقدامات کے متعدد آپشنز پر بریفنگ دیں گے، جن میں آن لائن حکومت مخالف بیانیے کو تقویت دینا اور ایرانی فوجی و شہری تنصیبات کے خلاف خفیہ سائبر ہتھیاروں کا استعمال شامل ہے۔
اس بریفنگ میں امریکی وزیر خارجہ مارکو روبیو، وزیر دفاع پیٹ ہیگستھ اور چیئرمین جوائنٹ چیفس آف اسٹاف جنرل ڈین کین کی شرکت متوقع ہے۔
دوسری جانب ایران میں حکومت مخالف مظاہروں کے سبب انٹرنیٹ بلیک آؤٹ تیسرے روز بھی جاری ہے، جس کے باعث عوام کا دنیا سے رابطہ منقطع ہوگیا ہے۔
