لاہور: (دنیا نیوز) وزیراعلی پنجاب عثمان بزدار نے تاجر برادری کے مسائل جلد حل کرنے کی یقین دہانی کروا دی، عثمان بزدار کہتے ہیں کہ حکومت صنعتکاروں کیلئے مزید آسانیاں پیدا کرے گی، کاروبار چلنے سے ہی عام آدمی کو روز گار ملے گا، مزید کاروبار کھولنے کے لئے وفاقی حکومت کو سفارش کی ہے۔
وزیراعلیٰ پنجاب سردار عثمان بزدار سے اپٹما کے سربراہ گوہر اعجاز کی قیادت میں صنعتکاروں اور تاجر برادری کے نمائندہ وفد نے ملاقات کی، ملاقات کرنے والوں میں صدر لاہور چیمبر آف کامرس اینڈ انڈسٹری عرفان اقبال شیخ، عدیل بشیر، احمد ظفر، پرویز لالہ، اکبر شیخ، ایس ایم نبیل اور دیگر شامل تھے۔ صوبائی وزراء میاں اسلم اقبال، ہاشم جواں بخت، فیاض الحسن چوہان، وائس چیئرمین ایل ڈی اے شیخ عمران بھی اس موقع پر موجود تھے-
ملاقات میں وزیراعلی پنجاب کا کہنا تھا کہ پنجاب حکومت صنعتکاروں اور تاجر برادری کے لئے مزید آسانیاں پیدا کرے گی- وزیراعلی نے کہا کہ پنجاب میں مرحلہ وار کا روبار کی اجازت دینے کے لئے ایس او پیز تیار کر لئے گئے ہیں- روڈ سیکٹر اور بلڈنگ کے علاوہ کنسٹرکشن سے متعلقہ دیگر انڈسٹری کو کھولنے کی اجازت دی جائے گی، سفارشات تیار کر کے وفاقی حکومت کو پیش کردی ہیں-
عثمان بزدار نے کہاکہ وفاقی حکومت کی مشاورت سے ایکسپورٹ سیکٹر سے منسلک فیڈنگ انڈسٹری کو بھی کھولا جائے گا- پاور لومز کو کام کرنے کی اجازت دے رہے ہیں- ایسی تمام فیکٹریز جن کے اندر اپنی لیبر کالونیاں موجود ہیں انہیں بھی کھولنے کی سفارش کی ہے۔ آئرن اینڈ سٹیل انڈسٹری اور ہوم اپلائسسز انڈسٹری کو کھولنے کی تجویز دی ہے، مارکیٹوں اور بازاروں کومرحلہ وار اوپن کیاجائے گا-س
عثمان بزدار کا کہنا تھا کہ زوننگ کر کے مارکیٹوں اور بازاروں کو مخصوص دن اور مخصوص اوقات میں کھولنے کی تجویز ہے- تمام سٹیک ہولڈرز کی مشاورت سے مارکیٹیں اور بازار کھولنے کا فیصلہ کیا جائے گا-صنعتکاروں اور تاجر برادری کے مسائل کے حل کے لئے صوبائی وزیر صنعت کی سربراہی میں کمیٹی تشکیل دی ہے-
