لاہور: (ویب ڈیسک) پاکستان سٹاک مارکیٹ میں ایک مرتبہ پھر 90.47 پوائنٹس کی تیزی ریکارڈ کی گئی۔
تفصیلات کے مطابق رواں ہفتے کے دوسرے کاروباری روز کے دوران ایک مرتبہ پھر پاکستان سٹاک مارکیٹ میں تیزی ریکارڈ کی گئی، پورے کاروباری روز کے دوران اُتار چڑھاؤ دیکھنے کو ملا، گزشتہ روز انڈیکس 44766.59 پوائنٹس کی سطح پر بند ہوا تھا۔
کاروبار کے دوران تیزی کے باعث انڈیکس ایک موقع پر 44910.93 پوائنٹس کی سطح پر پہنچ گیا تھا تاہم کاروبار کے اختتامی لمحات تک یہ سطح برقرار نہ رہ سکی۔
رواں ہفتے کے دوسرے کاروباری روز کے دوران پاکستان سٹاک مارکیٹ میں 100 انڈیکس 90.47 پوائنٹس کی تیزی کے بعد 44857.06 پوائنٹس کی سطح پر پہنچ کر بند ہوا، پورے کاروباری روز کے دوران کاروبار میں 0.2 فیصد کی بہتری دیکھی گئی جبکہ 16 کروڑ 85لاکھ 79 ہزار 970 شیئرز کا لین دین ہوا جس کے باعث سرمایہ کاروں کو 15 ارب روپے سے زائد کا فائدہ ہوا۔
