کراچی: (دنیا نیوز) سیلز ٹیکس کی عدم وصولی پر ایف بی آر نے سوئی سدرن کے بینک اکاونٹس منجمد کرنے کا حکم نامہ جاری کردیا تاہم گیس ترسیلی کمپنی کا کہنا ہے کہ ٹیکس جمع کرنے والے ادارے کے نوٹسز کو قانونی معیار سے عاری ہونے کی وجہ سے سندھ ہائی کورٹ نے معطل کردیا۔
ایف بی آر لارج ٹیکس پیئر آفس کراچی کی جاری پریس ریلیز کے مطابق سوئی سدرن سیلز ٹیکس کی مد میں 23 ارب روپے کی نادہندہ ہے اور واجبات میں سے صرف 31 کروڑ روپے وصولی ہوسکی ہے اور گیس کی ترسیلی کمپنی کے اکاؤنٹس اس لیے منجمد کیے تھے تاکہ واجب الادا رقم ریکور کی جائے۔
دوسری جانب سوئی سدرن کا کہنا ہے کہ لارج ٹیکس پیئر یونٹ نے قانونی عمل کی پیروی کیے بغیر اور آزاد فورم یعنی اپیلٹ ٹریبونل کے فیصلے کا انتظار کیے بغیر بینکوں کو ریکوری کے نوٹسز جاری کیے جسےسندھ ہائی کورٹ نے معطل کردیا۔
