اسلام آباد: (ویب ڈیسک) ملک میں ہفتہ وار مہنگائی کی شرح 41.07 فیصد ہوگئی۔
ادارہ شماریات کے مطابق ہفتہ مہنگائی کی شرح میں معمولی کمی ہوئی جس میں مہنگائی کی شرح 0.30 فیصد کم ہوئی جبکہ ایک ہفتےمیں 32 اشیائے ضروریہ کی قیمتوں میں اضافہ ہوا۔
رپورٹ میں بتایا گیا ہےکہ ہفتہ وار مہنگائی کی مجموعی شرح 41.07 فیصد کی سطح پر پہنچ گئی ہے، مہنگائی سے سب سے زیادہ متاثر متوسط طبقہ ہوا جبکہ 44 ہزار سے زائد ماہانہ انکم والے طبقے کے لیے مہنگائی کی شرح 42.42 فیصد ریکارڈ کی گئی۔
ادارہ شماریات کے مطابق آٹا، گھی، چینی، تازہ دودھ، بکرے کے گوشت، چاول اور نمک سمیت رواں ہفتے کے دوران 32 اشیائے ضروریہ کی قیمتوں میں اضافہ ہوا ،8 اشیاء کی قیمتوں میں کمی ہوئی جبکہ 10 میں استحکام رہا۔
رپورٹ کے مطابق ایک ہفتے میں آٹے کے 20 کلو تھیلے کی قیمت بڑھ کر اوسطاً 1705 روپے ہوگئی، گھی، دال ماش، دال مسور، چاول اور نمک کی قیمتوں میں بھی اضافہ ہوا جبکہ پیاز 22 روپے، لہسن 18 روپے فی کلو اور انڈے 16 روپے فی درجن سستے ہوئے ہیں۔
