اسلام آباد:(دنیا نیوز) وزیراعظم محمد شہباز شریف سے چینی کمپنی شینڈونگ زن زو (Shandong Xinxu) گروپ کارپوریشن کے وفد نے ملاقات کی۔
وفاقی دارالحکومت میں ہونے والی ملاقات میں وفد کی قیادت شینڈونگ زن زو گروپ کے چئیرمین ہیو جیانزن (Hou Jianxin) نےکی۔
اس موقع پر شہبازشریف نے وفد سے گفتگو کرتے ہوئے کہا کہ دونوں ممالک ہر مشکل میں ایک دوسرے کے ساتھ کھڑے رہے ہیں، پاکستان چین کے ساتھ اقتصادی تعلقات کو نئی بلندیوں پر لے جانا چاہتا ہے، چینی صنعتوں کو پاکستان میں سرمایہ کاری کی دعوت دیتے ہیں۔
انہوں نے کہا کہ وزیراعظم حکومت خصوصی اقتصادی زونز کے قیام کے لیے ہر ممکن سہولیات فراہم کرے گی، پاکستان کے شپ بریکنگ اور شپ ری سائیکلنگ کے شعبوں میں بے پناہ استعداد موجود ہے۔
چینی کمپنی شینڈونگ کے چیئرمین ہیو جیانزن (Hou Jianxin) نے حکومت پاکستان کی جانب سے سہولیات کی فراہمی پر وزیراعظم کا شکریہ ادا کرتے ہوئے کہا کہ ان کی کمپنی پاکستان میں میری ٹائم انڈسٹریل کمپلیکس کے قیام میں دلچسپی رکھتی ہے۔
انہوں نے کہا کہ ہماری کمپنی پاکستان میں گرین شپ بریکنگ یارڈ تعمیر کرے گی، ماہی گیری ، فش پراسیسنگ اور کھجوروں کی پراسیسنگ کے حوالے سے پاکستان کی استعداد سے فائدہ اٹھانا چاہتے ہیں۔
چینی وفد سے ملاقات کے دوران وفاقی وزیر بحری امور جنید امور چودھری، وزیراعظم کے مشیر ڈاکٹر توقیر شاہ اور متعلقہ اعلیٰ سرکاری افسران نے بھی شرکت کی۔
