اسلام آباد: (دنیا نیوز) وزیراعظم شہباز شریف نے کہا ہے کہ حکومت، شعبۂ صحت، پولیو ورکرز اور تمام متعلقہ ادارے ملک سے پولیو کے مکمل خاتمے کیلئے پرعزم ہیں۔
وزیراعظم شہباز شریف سے روٹری انٹرنیشنل فاؤنڈیشن کے صدر فرانسیسکو اریزو (FRANCESCO AREZZO) نے وفد کے ہمراہ ملاقات کی، اس موقع پر وفاقی وزیرِ صحت سید مصطفیٰ کمال، وزیراعظم کی انسداد پولیو کیلئے نمائندہ خصوصی عائشہ رضا فاروق اور دیگر اعلیٰ حکام بھی موجود تھے۔
اس موقع پر وزیراعظم کا کہنا تھا کہ پولیو مہمات میں پولیو ورکرز کا کردار نہایت قابل تحسین ہے، روٹری انٹرنیشنل کے شکرگزار ہیں کہ وہ اس موذی مرض کے پاکستان سے خاتمے کیلئے باقی بین الاقوامی اداروں کی طرح بھرپور تعاون کر رہے ہیں۔
.jpg)
انہوں نے کہا کہ پولیو کے خاتمے کی راہ میں مشکلات ضرور ہیں مگر یہ ناممکن نہیں، اور ہم اپنے عزم، محنت اور قومی یکجہتی سے پاکستان کے بچوں کا محفوظ مستقبل یقینی بنائیں گے۔
روٹری انٹرنیشنل فاؤنڈیشن کے وفد نے حکومت پاکستان کے انسداد پولیو اقدامات کی تعریف کرتے ہوئے کہا کہ وزیراعظم کی خصوصی توجہ اور مؤثر قیادت کی بدولت ملک سے اس موذی مرض کا جلد خاتمہ ممکن ہوجائے گا۔
اس موقع پر فاؤنڈیشن نے انسداد پولیو کے لئے اپنی معاونت جاری رکھنے کے عزم کا اعادہ کیا۔
وفد نے بتایا کہ گزشتہ برس روٹری انٹرنیشنل نے 500 ملین ڈالر پولیو کے خاتمے کی مہم پر پاکستان میں خرچ کئے اور رواں برس بھی خطیر رقم خرچ کرنے کا ارادہ رکھتی ہے، وفد نے وزیراعظم کی جانب سے انسداد پولیو ٹیم کے انتخاب اور ان کی کوششوں کو بھی سراہا۔
