اسلام آباد: (مدثر علی رانا) 2022 کے سیلاب کے بعد جنیوا ڈونرز کانفرنس میں پاکستان کے لیے اعلان کردہ 11 ارب ڈالر کی فنانسنگ میں تاحال واضح پلاننگ اور ہدف کے حصول کا فقدان ہے، تین سال سے زائد عرصے میں پاکستان کو مجموعی طور پر صرف 4 ارب 69 کروڑ ڈالر موصول ہو سکے ہیں۔
دستاویزات کے مطابق موصول ہونے والی فنانسنگ میں 2 ارب 75 کروڑ ڈالر پراجیکٹس جبکہ ایک ارب 93 کروڑ ڈالر کموڈیٹی خریداری کے لیے استعمال ہوئے۔
رواں مالی سال کے لیے جنیوا کانفرنس کے تحت ایک ارب 26 کروڑ ڈالر فنانسنگ کا ہدف مختص کیا گیا ہے جس میں سے 76 کروڑ ڈالر سے زائد پراجیکٹ فنانسنگ کا تخمینہ لگایا گیا ہے۔
یاد رہے کہ جنیوا ڈونرز کانفرنس میں پاکستان نے مجموعی طور پر 10 ارب 98 کروڑ ڈالر کی پلیجز حاصل کی تھیں، تاہم سیلاب سے نقصانات کے لیے اعلان کردہ 54 کروڑ ڈالر کی گرانٹس میں سے صرف 21 لاکھ ڈالر امداد پاکستان کو موصول ہو سکی۔
ماہرین کے مطابق بیشتر رقوم باہمی اور کثیرالجہتی معاہدوں کے تحت لانگ ٹرم بنیادوں پر اور مختلف شرح سود کے ساتھ پاکستان کو فراہم کی جائیں گی۔
