مظفرآباد: ( بیورورپورٹ) وزیراعظم یوتھ لون سکیم کے تحت بلاسود قرضوں کی فراہمی کے حوالے سے آزاد جموں کشمیر بینک اور سمال انڈسٹریز کارپوریشنز میں مفاہمتی یادداشت پر دستخط کئے گئے، ایک ارب روپے کے اس انقلابی منصوبے کے تحت آزاد کشمیر کے نوجوانوں کو با اختیار بنانے کیلئے 5 سے 20 لاکھ تک کے بلاسود قرضہ جات دیئے جائیں گے۔
معاہدے پر دستخط کی تقریب میں وزیر سمال انڈسٹریز تقدیس گلانی اور بینک کے چیئرمین و وزیر خزانہ عبدالماجد ماجد خان، سیکرٹری خزانہ اسلام زيب، سیکرٹری انڈسٹریز چودھری عبدالرحمان، صدر/سی ای او بینک شاہد شہزاد میر، منیجنگ ڈائریکٹر سمال انڈسٹریز محمد ذیشان عارف، ڈائریکٹر سمال انڈسٹریز عبدالخالق عباسی، ڈی ایچ سی ایم ڈی محمد امتیاز شاہین و دیگر نے شرکت کی۔
یہ منصوبہ نوجوانوں کو معاشی طور پر خود کفیل بنانے کی ایک بڑی کوشش ہے، جس کیلئے وزیراعظم آزاد کشمیر چودھری انوارالحق، وزیر خزانہ ماجد خان اور وزیر برائے سمال انڈسٹریز تقدیس گیلانی کی ذاتی دلچسپی اور کوششیں قابلِ تحسین ہیں۔
اس سکیم کے تحت نوجوانوں کو 5 لاکھ سے 20 لاکھ روپے تک کے قرضے فراہم کئے جائیں گے، جن میں 5 لاکھ روپے تک قرض صرف پانچ ضامنوں پر دستیاب ہوگا، اس کے علاوہ اس سکیم میں 48 فیصد کوٹہ خواتین کیلئے مختص کیا گیا ہے، جب کہ پہلی مرتبہ ٹرانس جینڈر افراد کو بھی باعزت روزگار کیلئے قرضوں کی سہولت فراہم کی جا رہی ہے، یہ قرضے نئے اور سٹارٹ اپ کاروبارکیلئے دیئے جائیں گے۔
سکیم کا بنیادی مقصد خطے کے نوجوانوں کو بلاسود قرضے فراہم کر کے ان میں کاروباری صلاحیتیں اجاگر کرنا، روزگار کے نئے مواقع پیدا کرنا، غربت میں کمی لانا اور نجی شعبے میں معاشی سرگرمیوں کو فروغ دینا ہے۔
اس سکیم کے تحت دونوں ادارے آزاد کشمیر کے تمام دس اضلاع میں نوجوانوں کو چھوٹے کاروبار قائم کرنے اور انہیں فروغ دینے میں معاونت کریں گے۔
اس موقع وزیر خزانہ ماجد خان نے کہا کہ یہ اقدام نوجوانوں کے خوابوں کو حقیقت بنانے کی سمت ایک اہم پیش رفت ہے، حکومت کی خواہش ہے کہ نوجوانوں کو با اختیار بنایا جائے تاکہ وہ اپنی سطح پر روزگار کے مواقع پر پیدا کر سکیں۔
کشمیر بینک کے صدر شاہد شہزاد میر نے کہا کہ بینک کی پوری ٹیم اس سکیم کو کامیاب بنانے کیلئے پرعزم ہے، ہم نوجوان کاروباریوں کو نہ صرف مالی بلکہ تکنیکی معاونت بھی فراہم کریں گے، اس سکیم سے آزاد کشمیر کے ہزاروں نوجوانوں کے لئے مستقبل میں روشنی کی نئی کرن دیکھی جا رہی ہے۔
