لاہور: (دنیا نیوز) اداکار یوسف خان کو دنیا سے رخصت ہوئے 16 برس بیت گئے۔
گرجدار آواز، بارعب شخصیت کے مالک اداکار یوسف خان نے کئی فلموں میں یادگار کردار نبھائے، حقیقت سے قریب تر اداکاری کا خاصا رکھنے والے یوسف خان 10 اگست 1931ء کو مشرقی پنجاب کے شہر فیروز پور میں پیدا ہوئے۔
یوسف خان نے1954ء میں فلم ’’پرواز‘‘ سے فلمی کیریئر کا آغاز کیا، اس بہترین فلم میں مشہور اداکارہ صبیحہ خانم ان کی ہیروئن کے روپ میں جلوہ گر ہوئیں، یوسف خان نے اردو اور پنجابی فلموں میں اپنے کرداروں کو اس طرح نبھایا کہ وہ پاکستان کے نامور اور پائے کے اداکار ثابت ہوئے۔
اداکار نے ’مجرم‘، ’حسرت‘، ’بھروسہ‘، ’فیصلہ‘ اور ’نیا دور‘ جیسی اردو فلموں میں اپنے فن کا بہترین لوہا منوایا، اداکار نے 1962ء میں فلم پہاڑن‘ سے پنجابی فلموں میں اداکاری کا آغاز کیا،’ملنگی‘، ’یارانہ‘، ’باؤ جی‘، ’ضدی‘،’ وارنٹ‘، ’ہتھکڑی‘، ’جگنی‘، ’شریف بدمعاش‘،’ قسمت‘،’ جبرو‘،’ خطرناک‘،’ حیدر خاں‘ اور’ بڈھا گجر‘ ان کی سرفہرست فلمیں ہیں۔
یوسف خان کو 2006ء میں حکومت پاکستان نے صدارتی ایوارڈ تمغہ برائے حسن کارکردگی سے نوازا، اداکار کو فلم نگری کا سب سے بڑا اور معتبر ایوارڈ نگار اور نگار ملینیم ایوارڈ بھی دیا گیا۔
لیجنڈ اداکار یوسف خان 20 ستمبر 2009ء کو لاہور میں انتقال کر گئے تھے۔
