اسلام آباد :(دنیا نیوز) اقتصادی رابطہ کمیٹی (ای سی سی) نے استعمال شدہ گاڑیوں کی کمرشل درآمد کی اجازت دے دی۔
ای سی سی اعلامیہ کے مطابق وزیرخزانہ کی زیرصدارت اقتصادی رابطہ کمیٹی کا ورچوئلی اجلاس ہوا جس میں استعمال شدہ گاڑیوں کی کمرشل درآمد کی اجازت کے حوالے سے مختلف اُمور پر تبادلہ خیال کیا گیا۔
اعلامیہ میں بتایا کہ پانچ سال سے کم پرانی گاڑیاں 30 جون 2026 تک درآمد کی جا سکیں گی، تاہم بعد ازاں گاڑیوں کی عمر کی حد ختم کر دی جائے گی۔
ای سی سی اعلامیہ میں بتایا گیا کہ اجلاس کے شرکا کا کہنا تھا کہ کمرشل درآمد شدہ گاڑیاں ماحولیاتی اور حفاظتی معیار پر پورا اتریں گی،پانچ سال سے کم پرانی گاڑیوں پر 40 فیصد ریگولیٹری ڈیوٹی عائد ہوگی۔
اسی طرح ریگولیٹری ڈیوٹی 2026 سے ہر سال 10 فیصد کم کی جائے گی، مالی سال30-2029 تک درآمدی ڈیوٹی بتدریج ختم کر دی جائے گی، اجلاس میں پی وی اے آر اے کیلئے 80 کروڑ روپے کی گرانٹ بھی منظور ہوئی۔
خیال رہے اقتصادی رابطہ کمیٹی (ای سی سی) اجلاس میں پٹرولیم، توانائی اور غذائی تحفظ کے وزراء سمیت اعلیٰ حکام شریک تھے۔
