اسلام آباد:(دنیا نیوز) اقتصادی رابطہ کمیٹی ( ای سی سی ) نے گلگت بلتستان کے سیلاب زدگان کےلیے تین ارب روپے کے ریلیف پیکیج کی منظوری دے دی۔
وفاقی دارالحکومت میں وزیرخزانہ محمد اورنگزیب کی زیرصدارت اقتصادی رابطہ کمیٹی کا اجلاس ہوا جس میں وفاقی وزرا اویس لغاری، علی پرویز ملک اور رانا تنویر نے شرکت کی۔
ای سی سی اجلاس میں کہا گیا ہے کہ متاثرہ خاندانوں کو خیمے، ادویات، خوارک اور بنیادی سہولیات فراہم کی جائیں گی۔
دوسری جانب اقتصادی رابطہ کمیٹی اجلاس میں پاکستان ٹیلی ویژن کارپوریشن ( پی ٹی وی ) کے لیے 11 ارب کی ضمنی تکنیکی گرانٹ کی پہلی قسط کی منظوری بھی دی گئی۔
علاوہ ازیں ای سی سی نے ابتدائی قسط کے طور پر تین ارب 81 کروڑ 30 لاکھ روپے منظور کرلیے، باقی رقم سہ ماہی بنیاد پر تنخواہوں، پینشن اور آپریشنل اخراجات کے لیے جاری ہوگی۔
