واشنگٹن: (دنیا نیوز) پاکستانی وزیر مملکت برائے کرپٹو اور بلاک چین بلال بن ثاقب نے امریکی صدر ڈونلڈ ٹرمپ کے کرپٹو مشیر پیٹرک وٹ سے ملاقات کی جس میں باہمی دلچسپی کے امور پر گفتگو کی گئی۔
وائٹ ہاؤس میں ملاقات کے دوران پاکستان اور امریکا کے درمیان بلاک چین اور ڈیجیٹل اثاثوں میں تعاون بڑھانے پر تبادلہ خیال کیا گیا۔
اس موقع پر بلال بن ثاقب نے کہا کہ کرپٹو اور ڈیجیٹل اثاثوں میں پاکستان عالمی قیادت کے ساتھ ہے، امریکہ اور پاکستان، بلاک چین اور ڈیجیٹل اثاثوں میں تعاون کے ذریعے تعلقات کو مزید مستحکم بنانے کی راہ پر گامزن ہیں۔
انہوں نے کہا کہ پاکستان عالمی ڈیجیٹل معیشت اور جدید ٹیکنالوجی میں ترقی کی راہ ہموار کر رہا ہے۔
قبل ازیں وزیر مملکت بلال بن ثاقب نے اقوام متحدہ میں مصنوعی ذہانت کے متعلق ایک اجلاس میں شرکت کی جس کا اہتمام سعودی عرب اور کینیا نے کیا۔
