اسلام آباد: (دنیا نیوز) انکم ٹیکس ریٹرن جمع کروانے کی ڈیڈ لائن گزر گئی جبکہ ایف بی آر کی جانب سے اس بار توسیع نہیں کی گئی، اب گرفت ہوگی اور پنالٹی بھی لگے گی۔
فیڈرل بورڈ آف ریونیو (ایف بی آر) میں سال 2025ء کیلئے انکم ٹیکس ریٹرنز جمع کروانے والوں میں17 اعشاریہ 6 فیصد کا نمایاں اضافہ ریکارڈ کیا گیا ہے، 30 جون کو ختم ہونے والے مالی سال 2025ء کیلئے تقریباً 60 لاکھ شہریوں نے گوشوارے جمع کروائے۔
36 لاکھ ٹیکس دہندگان نے ریٹرنز کے ساتھ ٹیکس ادائیگی بھی کی جو پچھلے سال کے مقابلے میں 18 اعشاریہ 6 فیصد زیادہ ہے، انفرادی طور پر شہریوں نے 69 ارب روپے ٹیکس ادا کیا، 70 ہزار ٹیکس دہندگان کو ٹارگٹڈ ای میلز بھی بھیجی گئیں۔
ایف بی آر اعلامیے میں کہا گیا کہ وزیر اعظم شہباز شریف کی ہدایات کے مطابق ریٹرن جمع کروانے کی تاریخ میں کوئی عمومی توسیع نہیں کی گئی، جن ٹیکس دہندگان کو مشکلات ہوں، وہ متعلقہ فیلڈ فارمیشن سے رابطہ کر کے ریٹرنز جمع کروانے میں توسیع لے سکتے ہیں۔
خیال رہے کہ گزشتہ روز ایف بی آر کی جانب سے بتایا گیا تھا کہ موجودہ اعداد و شمار آج شام 7 بجے تک کے ہیں، تاہم اب مقررہ وقت گزرنے کے باوجود ٹیکس ریٹرنز کی مدت میں اضافہ نہ ہونا یہ ظاہر کرتے ہیں ٹیکس ریٹرن جمع نہ کروانے والوں کے خلاف اب ایکشن ہوگا۔
