اسلام آباد:(دنیا نیوز) ایف بی آر نے ٹیکس چوری کرنے پرکروڑوں مالیت کا الیکٹرانکس سامان ضبط کرلیا۔
ایف بی آر حکام کے مطابق قیمتی الیکٹرانک سامان کو گڈز ڈیکلریشن جمع کرائے بغیر غیر قانونی طور پر کسٹمز ڈیوٹی اور ٹیکس ادا کیے بغیر باہر نکالا جا رہا تھا۔
حکام کا کہنا تھا کہ اس فراڈ میں ایک غیر ملکی گراؤنڈ ہینڈلنگ کمپنی کے ملازمین اور بدعنوان درآمد کنندگان ملوث پائے گئے ،اس فراڈ کا انکشاف قابل اعتماد انٹیلی جنس معلومات موصول ہونے پر ہوا، بروقت کارروائی کے نتیجے میں 10 کروڑ 30 لاکھ روپے مالیت کی ایک کھیپ ضبط کر لی گئی۔
اِسی طرح ضبط کئےجانے والے سامان میں لیپ ٹاپس، آئی پیڈز، آئی فونز، میک بُکس، پلے سٹیشنز اور میموری کارڈز شامل ہیں ،دو کھیپیں جعلی گیٹ پاسز کی بنیاد پر دھوکہ دہی سے کلیئر کی جا چکی تھیں، کلکٹوریٹ آف کسٹمز ایئرپورٹ کراچی نے فوری طور پر دو ایف آئی آر درج کرا کے اس جرم میں ملوث کمپنی کے ملازمین کو گرفتار کر لیا۔
حکام کا کہنا تھا کہ جعلی طریقہ کار سے مجموعی طور پر پانچ کھیپیں غیر قانونی طور پر باہر نکالی گئیں،اُن کو کسٹمز کے WeBOC سسٹم سے چھپایا گیا اور جی ڈی دائر نہ کرکے جعلی گیٹ پاسز کے ذریعے کلیئرنس ممکن بنائی گئی، غیر قانونی کلیئرنس پر کسٹمز ڈیوٹی اور ٹیکس چوری کی کُل تخمینہ شدہ مالیت 38 کروڑ 40 لاکھ روپے ہے۔
ایف بی آر حکام نے مزید کہا کہ یہ کارروائی قومی محصولات کے تحفظ اور عوامی اعتماد کی بحالی کے لیے ایف بی آر کے عزم کی عکاسی کرتی ہے، مزید ایف آئی آرز اور گرفتاریاں بھی متوقع ہیں، ایف بی آر اس معاملے میں کوئی دقیقہ فروگذاشت نہیں کرے گا،اپنی ذمہ داریاں پوری کرنے میں ناکام رہنے والے کسٹمز اہلکار کسی رعایت کے مستحق نہیں ہوں گے۔
