کراچی: (حمزہ گیلانی) پاکستانی توانائی شعبے میں بڑا بریک تھرو ہوا ہے، تین آف شور اور دو آن شور بلاکس کے تاریخی معاہدے ہوگئے۔
حکومت پاکستان نے 2 دسمبر کو تیل و گیس ذخائر کی تلاش کے 5 بڑے معاہدوں پر دستخط کئے۔
حکومت نے تیل و گیس ذخائر کی کھوج کیلئے تین آف شور اور دو آن شور بلاکس کو فائنل کیا، حکومتی معاہدوں کی تفصیلات ماری انرجیز لمیٹڈ نے پاکستان سٹاک ایکسچینج کو ارسال کر دیں۔
خط میں کہا گیا کہ حکومت نے ایسٹرن آف شور انڈس پر تیل و گیس ذخائر کھوج کیلئے معاہدہ کیا، ایسٹرن آف شور انڈس سی کا آپریشن ترکش پٹرولیم اوورسیز کمپنی سنبھالے گی، جبکہ آف شور ڈیپ سی پر تیل و گیس ذخائر کھوج کیلئے بھی معاہدہ ہوا، آف شور ڈیپ سی بلاک کا آپریشن ماری انرجیز کمپنی کو سونپا گیا ہے۔
اسی طرح حکومت نے آف شور ڈیپ ایف مقام پر بھی تیل و گیس ذخائر کھوج کیلئے معاہدہ کیا، جس کا آپریشن بھی ماری انرجیز کے پاس ہے۔
خط میں مزید بتایا گیا کہ آن شور بلاکس میں زیارت نارتھ بلاک اور سکھ پورٹو بلاک میں تیل وگیس ذخائر تلاش کے حکومتی معاہدے ہوئے، ترکش پٹرولیم اوورسیز کمپنی، ماری انرجیز، او جی ڈی سی ایل، فاطمہ پٹرولیم، پی پی ایل، گورنمنٹ ہولڈنگ لمیٹڈ کمپنیاں بلاکس پر کام کریں گی۔
