پشاور: (آن لائن) نوجوان کرکٹرز جم خانہ گراؤنڈ میں ڈیرن سیمی کے حق میں نعرے لگاتے رہے، انہوں نے مطالبہ کیا کہ سیمی کو ویسٹ انڈین ٹیم میں شامل کیا جائے۔
ویسٹ انڈین کرکٹر ڈیرن سیمی کے حق میں ان کے مداحوں کی جانب سے ریلی نکالی گئی جن کا مطالبہ تھا کہ سیمی کو دوبارہ ویسٹ انڈیز کی ٹیم میں شامل کیا جائے۔ پشاور کے نوجوان کرکٹرز نے پشاور زلمی کے کپتان ڈیرن سیمی کے حق میں ریلی نکالی اور انہیں ویسٹ انڈیز ٹیم میں شامل نہ کرنے پر ان سے اظہار یکجہتی بھی کیا۔
ریلی جیم خانہ گراونڈ سے شرو ع ہو کر مختلف راستوں سے ہوتی ہوئی جم خانہ گیٹ پر اختتام پذیر ہوئی، ریلی میں شریک نوجوان کرکٹرز نے پلے کارڈز ا ٹھا رکھے تھے جن پر ڈیرن سیمی کے حق میں نعرے درج تھے۔ نوجوان کرکٹرز نے کہا کہ ڈیرن سیمی نے پاکستان کی خدمت کی اور پوری دنیا کو پاکستان میں امن کی بحالی کا پیغام دیا۔ انہوں نے اس امر پر افسوس کا اظہار کیا کہ ڈیرن سیمی کو پاکستان کی خدمت کا یہ صلہ ملا کہ انہیں ویسٹ انڈیز کی ٹیم میں شامل نہیں کیا گیا۔ ریلی کے شرکا نے ویسٹ انڈیز کرکٹ بورڈ سے مطالبہ کیا کہ ڈیرن سیمی کو دوبارہ ٹیم میں شامل کیا جائے تاکہ وہ پاکستان آکر کرکٹ کے میدانوں کو آباد کریں۔
