لاہور: (ویب ڈیسک) پاکستانی کرکٹ ٹیم کے ٹیسٹ پلیئر شان مسعود نے کہا ہے کرکٹرز میں صلاحیت کے باوجود طویل فارمیٹ کی رینکنگ میں ساتویں پوزیشن ہمارے شایان شان نہیں۔
ایک انٹرویو کے دوران بیٹسمین کا کہنا تھا کہ ٹیسٹ فارمیٹ میں گرین کیپس کہیں زیادہ بہتر کارکردگی کا مظاہرہ کر سکتے ہیں، کھلاڑی نیوزی لینڈ ٹیسٹ سیریز سے رینکنگ اوپر لے جانے کی کوشش کریں گے۔ مضبوط کیوی باؤلنگ کا چیلنج قبول کرتے ہوئے بہتر بیٹنگ کریں گے، گزشتہ سیریز کی غلطیاں نہ دہراتے ہوئے بہتر کارکردگی دکھائیں گے۔
ٹیسٹ بیٹسمین نے کہا کہ کرکٹ میں ہر روز ایک نئے چیلنج کا سامنا کرنا پڑتا ہے، آپ اس پر پورا اترتے ہوئے کارکردگی دکھائیں تب ہی کامیابی ملتی ہے، رینکنگ بہتر بنانے کے لیے بڑی ٹیموں کے خلاف تسلسل کے ساتھ اچھی کارکردگی دکھانا ضروری ہے۔
ان کا کہنا تھا کہ قرنطینہ میں مشکل صورتحال تھی مگر اس کا دورانیہ پورا ہونے پر کرکٹرز نے بھرپور لطف اٹھایا،آپ ان کی خوشی تصویروں میں دیکھ سکتے ہیں۔
