نئی دہلی:(دنیا نیوز) پاکستان ویمن کرکٹ ٹیم کی کپتان بسمہ معروف اور ان کی بیٹی کی بھارتی ویمن ٹیم کے ساتھ وائرل ہونے والی تصویر پر سابق ورلڈ کلاس بیٹر سچن ٹنڈولکر بھی تبصرہ کیے بغیر نہ رہ سکے۔
لیجنڈری بھارتی بلے باز نے سوشل میڈیا پر بھارتی ویمن کرکٹرز کی بسمہ معروف کی بیٹی کے ساتھ تصویر شیئر کرتے ہوئے لکھا کہ یہ ایک خوبصورت لمحہ ہے، کرکٹ کی فیلڈ میں تو باؤنڈریز ہیں لیکن آف دی فیلڈ یہ تمام باؤنڈریز کو توڑ دیتی ہے اور کھیل سب کو متحد کردیتا ہے۔
What a lovely moment! Cricket has boundaries on the field, but it breaks them all off the field.
— Sachin Tendulkar (@sachin_rt) March 6, 2022
Sport unites!#CWC22 pic.twitter.com/isgALYeZe1
خیال رہے کہ گزشتہ روز پاکستان ویمن کرکٹ ٹیم کی کپتان بسمہ معروف کی بیٹی کے ساتھ بھارتی خواتین کھلاڑی اٹھکیلیاں اور سیلفیاں بناتی رہیں۔
نیوزی لینڈ کے شہر ماؤنٹ مانگنوئی میں قومی کرکٹ ٹیم کی کپتان بسمہ معروف کی شیر خوار بیٹی فاطمہ کے ساتھ بھارتی ویمن کرکٹرز کی ویڈیو وائرل ہوئی تھی۔
ویڈیو میں کپتان بسمہ معروف بیٹی کو لے کر کھڑی ہیں اور بھارتی کھلاڑی ان کے ارد گرد کھڑے ہوکر فاطمہ سے کھیلتی نظر آئیں۔
یہ خوبصورت اور دلچسپ واقعہ پاکستان اور بھارتی ٹیموں کے مابین میچ کے بعد دیکھنے کو ملا جبکہ اس سے قبل ورلڈ کپ کے اہم میچ میں بھارت نے پاکستان ویمن کرکٹ ٹیم کو 107رنز سے شکست دی تھی۔
