'کوئی بھی انڈیا کو نظر انداز نہیں کرسکتا'، رمیز راجہ کے بیان پر بھارتی وزیر کھیل کا ردعمل

نئی دہلی: ( ویب ڈیسک ) پاکستان کرکٹ بورڈ (پی سی بی) کے چیئرمین رمیز راجہ کے ورلڈ کپ میں شرکت نہ کرنے کے بیان پر ردعمل دیتے ہوئے بھارتی کے وزیر کھیل انوراگ ٹھاکر نے کہا ہے کہ ہندوستان کھیلوں کی دنیا میں ایک بڑی طاقت ہے اور کوئی بھی ملک اس ملک کو نظر انداز نہیں کرسکتا۔

خیال رہے کہ چیئرمین رمیز راجہ نے بھارت کے ایشیا کپ کیلئے نہ آنے کی صورت میں بھارت نہ جانے کا اعلان کیا ہے اور کہا ہے کہ بھارت نہیں آئے گا تو پاکستان بھی ورلڈ کپ کیلئے بھارت نہیں جائے گا۔

رمیز راجہ کا یہ بھی کہنا ہے کہ پاکستان بھارت میں نہیں کھیلے گا تو ورلڈ کپ کون دیکھے گا؟۔

بھارتی میڈیا کے مطابق رمیز راجہ کے بیان پر بھارت میں شدید غصہ پایا جاتا ہے اور ان کے بیان نے ایک طوفان برپا کر دیا ہے۔

رمیز راجہ نے واضح کر دیا کہ بھارتی کرکٹ ٹیم پاکستان کھیلنے نہ آئی تو ہم بھی بھارت نہیں جائیں گے۔

اسلام آباد میں گزشتہ روز ایک تقریب میں گفتگو کرتے ہوئے رمیز راجہ نے کہا کہ اگر پاکستان آئندہ برس انڈیا میں شیڈول ورلڈکپ میں شرکت نہیں کرے گا تو دیکھے گا کون؟‘

خیال رہے کہ ایشین کرکٹ کونسل کے صدر جے شاہ نے رواں برس اکتوبر میں بیان دیا تھا کہ بھارتی کرکٹ ٹیم اگلے سال ہونے والے ایشیا کپ کے لیے پاکستان نہیں جائے گی اور ہوسکتا ہے یہ ٹورنامنٹ کسی نیوٹرل مقام پر منتقل کردیا جائے۔

رمیز راجہ نے کہا کہ ہمارا واضح موقف ہے بھارتی ٹیم آئی گی تو ہی ہم ورلڈکپ میں کھیلنے جائیں گے نہ آئی تو پھر ورلڈکپ ہمارے بغیرکروا دکھا دیں۔ ہم بھارتی فیصلے پر جارحانہ انداز اپنائیں گے۔ ہماری ٹیم پارفارمنس دِکھا رہی ہے، ہم نے دنیا کے بڑے بزنس بنانے والی کرکٹ ٹیم کو ہرایا ہے، ہم ٹی20 ورلڈ کپ کا فائنل کھیل کرآئے ہیں۔ بھارتی کرکٹ بورڈ یا ایشین کرکٹ کونسل سے بھارت کی جانب سے پاکستان میں ایشیا کپ نہ کھیلنے کے حوالے سے تاحال بات نہیں ہوئی۔

انہوں نے کہا کہ میں ہمیشہ سے کہتا تھا ہم نے پاکستان کرکٹ کی معیشت کو بہتر کرنا ہے اور وہ ایک ہی صورت میں ہوگی جب ہماری ٹیم بہتر پرفارم کرے گی، ہم نے 2021 کے ٹی 20 ورلڈ کپ میں بھارت کو ہرایا، ایشیا کپ میں ہم نے بھارت کو ہرایا، ایک سال میں پاکستان کرکٹ ٹیم نے دو مرتبہ بلین ڈالر اکانومی کے بورڈ کو ہرایا ہے۔

واضح رہے کہ ایشیا کپ آئندہ برس پاکستان میں شیڈول ہے جو2023 کے وسط میں کھیلا جائے گا جس کا فارمیٹ ون ڈے رکھا گیا ہے۔ ایشیا کپ کے بعد 2023 میں بھارت میں ون ڈے کرکٹ کا عالمی کپ شیڈول ہے۔