کیپ ٹاؤن : ( ویب ڈیسک ) انٹرنیشنل کرکٹ کونسل ( آئی سی سی ) کے زیر اہتمام ویمنز ٹی ٹونٹی ورلڈ کپ میں آج مزید دو میچز کھیلے جائیں گے، پہلے میچ میں بھارت اور ویسٹ انڈیز جبکہ دوسرے میچ میں پاکستان اور آئرلینڈ کی ٹیمیں آمنے سامنے ہوں گی۔
آئی سی سی کے زیر اہتمام خواتین ٹی 20 ورلڈ کپ کے دلچسپ مقابلے جنوبی افریقہ میں جاری ہیں ، میگا ایونٹ میں آج بدھ کو مزید دو میچوں کا فیصلہ ہو گا ، پہلے میچ میں گروپ بی کی ٹیمیں بھارت اور ویسٹ انڈیز کیپ ٹاؤن میں آمنے سامنے ہوں گی جبکہ دوسرے میچ میں بھی گروپ بی کی خواتین ٹیمیں پاکستان اور آئرلینڈ اسی مقام پر مد مقابل ہوں گی ۔
میگا ایونٹ میں 10 خواتین ٹیمیں ٹائٹل کے حصول کے لئے پنجہ آزمائی کر رہی ہیں جبکہ آسٹریلوی ویمن ٹیم ٹائٹل کے دفاع کے لئے کوشاں ہے ۔
واضح رہے کہ پاکستانی خواتین ٹیم اپنا تیسرا میچ 19 فروری کو ویسٹ انڈیز اور چوتھا میچ 21 فروری کو انگلینڈ کے خلاف کھیلے گی۔
