لاہور: (عثمان فیاض) سال 2023 جلد ہی ماضی کا قصہ بن جائے گا، رواں برس کرکٹ کی دنیا میں قومی کھلاڑیوں کی پرفارمنس میں کئی اتار چڑھاؤ دیکھنے میں آئے۔
قومی ٹیم کے کھلاڑیوں کیلئے یہ سال کارکردگی کے لحاظ سے جیسا بھی ہو لیکن ذاتی زندگی کے لحاظ سے یہ سال ان کے لئے خوش قسمت رہا، کئی کھلاڑیوں نے شادی کر کے اپنی نئی زندگی کا آغاز کیا۔
رواں سال قومی ٹیم کے 6 کھلاڑی شادی کے بندھن میں بندھ گئے جن کی تفصیلات درج ذیل ہیں۔
شان مسعود
قومی کرکٹر بلے باز اور ٹیسٹ ٹیم کے کپتان شان مسعود نے پشاور سے تعلق رکھنے والی لڑکی نش خان سے 21 جنوری 2023 کو نکاح کیا تھا اور ان کے نکاح کی تقریب کی تصاویر اور ویڈیوز سوشل میڈیا پر وائرل ہوگئی تھیں۔
اپنی اہلیہ سے متعلق کرکٹر کا کہنا تھا کہ ان کی ہونے والی شریک سفر کا تعلق پشاور سے ہے اور ان کے نش خان سے چند سال سے تعلقات تھے۔
کرکٹر نے مزید بتایا تھا کہ وہ اپنی ہونے والی اہلیہ نش خان سے لاہور میں ملے تھے، جس کے بعد ان کے درمیان دوستی اور تعلقات ہوئے، اب وہ شریک حیات بننے جا رہے ہیں۔
شاداب خان
آل راؤنڈر شاداب خان نے 24 جنوری 2023 کو قومی ٹیم کے کوچ ثقلین مشتاق کی بیٹی سے سادگی سے نکاح کیا تھا۔
نکاح کی تقریب نجی رکھی گئی جبکہ شادی کی تصاویر بھی جاری نہیں کی گئی تھیں، اس کے علاوہ کرکٹر کی اہلیہ سے متعلق بھی تمام معلومات کو نجی رکھا گیا تھا۔
تاہم شاداب خان نے سوشل میڈیا پر اپنے نکاح کی ایک تصویر شیئر کر کے اس خبر سے متعلق مداحوں کو آگاہ کیا تھا۔
حارث رؤف
7 جولائی 2023 کو پاکستانی کرکٹر حارث رؤف اور ماڈل مزنا مسعود شادی کے بندھن میں بندھ گئے تھے۔
شادی کی تقریب لاہور میں انتہائی سادگی سے منعقد کی گئی، جس میں قریبی رشتے داروں اور دوستوں کو مدعو کیا گیا تھا، تیز رفتار باؤلر نے کڑھائی والی شیروانی زیب تن کی جس میں سنہری بٹن تھے۔
شاہین شاہ آفریدی
پاکستان کرکٹ ٹیم کے فاسٹ باؤلر شاہین شاہ آفریدی اور سابق کپتان شاہد آفریدی کی صاحبزادی انشا آفریدی کی شادی کی تقریب 19 ستمبر کو کراچی میں منعقد ہوئی تھی۔
دونوں کا نکاح فروری 2023 میں ہوا تھا، کرکٹ ورلڈکپ 2023 کے اہم ٹورنامنٹ کے فوراً بعد شاہین شاہ آفریدی شادی کے بندھن میں بندھ گئے تھے۔
امام الحق
رواں سال کے آخر میں 26 نومبر 2023 میں اوپنر بلے باز امام الحق اپنی قریبی دوست انمول محمود کے ساتھ شادی کے بندھن میں بندھ گئے تھے۔
— Imam Ul Haq (@ImamUlHaq12) November 25, 2023
امام الحق نے ایکس (سابق ٹوئٹر) پر نکاح کی تصاویر اور ویڈیو شیئر کرتے ہوئے انمول محمود کو جیون ساتھی ہونے کے ساتھ بہترین دوست قرار دیا تھا۔
انہوں نے لکھا کہ ’آج ہم نہ صرف جیون ساتھی بن گئے ہیں بلکہ ہماری دوستی مزید مضبوط ہوگئی ہے جس کی بنیاد ہماری محبت کی کہانی ہے۔‘
— Imam Ul Haq (@ImamUlHaq12) November 25, 2023
فہیم اشرف
امام الحق کی شادی کے دنوں میں ہی پنجاب کے شہر پھول نگر میں آل راؤنڈر فہیم اشرف نے بھی شادی کر لی تھی۔
فہیم اشرف کی شادی نارووال کے رانا شبیر کی صاحبزادی سے ہوئی تھی۔
نجی ٹی وی کے ایک صحافی نے فہیم اشرف سے سوال پوچھا تھا کہ بھابھی کو تحفہ کیا دیں گے؟ جس پر کرکٹر نے کہا کہ انہیں میں مل گیا ہوں، کیا کم ہے۔
