لاہور: (دنیا نیوز) آئی سی سی چیمپئنز ٹرافی کا کل سے آغاز ہونے جا رہا ہے جس کیلئے شاہینوں کی بھرپور تیاریوں کا سلسلہ جاری ہے۔
پاکستان کرکٹ ٹیم کی آئی سی سی چیمپئنز ٹرافی کے لیے تیاریاں بھرپور انداز میں جاری ہیں، دوسرے دن بھی کھلاڑیوں نے جم کر پریکٹس کی، نیشنل سٹیڈیم کے اوول گراؤنڈ پر پاکستانی ٹیم نے دوسرا پریکٹس سیشن کیا، اس دوران فاسٹ باؤلر حارث روف نے بھی باؤلنگ کی۔
کھلاڑیوں نے پریکٹس سیشن سے پہلے فزیکل ٹریننگ کی، اس کے بعد کیچنگ اور پھر باؤلنگ اور بیٹنگ کے نیٹ پر جوہر دکھائے۔
اس دوران فاسٹ باؤلر حارث رؤف نے باؤلنگ کی لیکن وہ چند ہی اوور کرانے کے بعد تھرو کی پریکٹس کرتے نظر آئے جبکہ ٹیم کے دیگر باؤلرز پورے ردھم کے ساتھ باؤلنگ اور بیٹر بیٹنگ کرتے رہے۔
واضح رہے کہ آئی سی سی چیمپینز ٹرافی کا آغاز کل سے ہو گا اور افتتاحی میچ میں پاکستان اور نیوزی لینڈ کی ٹیمیں کراچی کے نیشنل سٹیڈیم میں مد مقابل ہوں گی۔
